CEBU, Philippines - Nangayo pa og overtime ang San Marino Corned Tuna una nila makuha ang 65-62 nga kadaugan batok sa Rose Aquarius kagabii sa nagpadayong 5th CESAFI Partners' Cup didto sa Cebu Coliseum.
Ning pagsuwat, nagtigi pa ang Gaisano Capital batok sa Ave Maria Sanctuary Park nga nag-ilog sa solong liderato. Ang modaog maoy makakuha’g 2-0 nga baraha.
Giusikan sa San Marino ang ilang 11 puntos nga abante pagsugod sa fourth period, 52-41 tungod kay gihinay-hinayan kini’g papas sa Rose Aquarius hangtod nga miresulta gyud kini ngadto sa overtime.
Si James Ferraren maoy nakatabla, 56-all sa nahabiling 3:20 sa regulasyon ug gikan niadto wala na maka-iskor ang duha ka habig hangtod nga nihuni ang final buzzer nga nagpugos sa duwa ngadto sa overtime.
Si Rene Pacquiao usa sa nahimong bayani alang sa San Marino tungod kay ang iyang sagunson nga singko puntos maoy naghatag kanila’g tres puntos nga abante, 63-60.
Ang San Marino kinsa napilde sa Lion Tiger, 80-85 aduna nay 1-1 nga baraha.
Si Pacquiao mihakot og 15 puntos aron pangulohan ang San Marino, samtang sila si Ferraren ug Fritz Daalos maoy nangu sa pilderong Rose Aquarius sa ilang 11 puntos matag usa.
PUNTOS MATAG USA
San Marino (65) - Pacquiao 15, Nalos 10, Padilla 7, Armecin 6, Goloran 5, Pineda 5, Brigondo 4, Urot 4, Guillena 4, Pogoy 2, Wagas 2, Dalondonan 1
Rose Aquarius (62) - J. Ferraren 11, Daalos 11, Cabahug 8, Maraño 6, Sedurifa 6, Avila 5, D. Ferraren 4, Misa 3, Sollano 2, Corcilles 2, Genobia 2, Meca 2 (BANAT NEWS)