SKO summer clinic gisugdan na, apan padayon pa manawat og entrante

CEBU, Philippines - Nagsugod na ang Sports Karatedo Organization (SKO) sa ilang summer clinic, apan padayon pa gihapon manawat og mga estudyante nga buot makat-on ning maong matang sa paugnat didto sa San Roque Gym sa Brgy. Subangdaku, Mandaue City.

Si dojo master Shihan Jessie Paredes mitanyag og karate class sa mga estudyante nga mag-edad og sayes anyos pataas isip kabahin sa ilang Milo Summer Sports program.

Gawas sa pagtudlo sa mga estudyante, magsilbe usab kini ka lakang aron makakita og mga karatedo prospects aron maoy morepresentar sa nasud sa mga international competitions ugma damlag.

Ang clinic himuon matag Biyernes ug Sabado gikan sa alas-6:30 hangtod sa alas-9 sa gabii.

Sa mga interesadong mosalmot aduna kini registration fee nga P3,200, lakip na niini ang uniform.   - BANAT NEWS