SCSIT nag-una na sa liderato sa CBA

CEBU, Philippines - Ang Salazar Colleges of Science and Institute of Technology (SCSIT) Skyblazers nagsalig nilang 6-foot-8 center Rino Berame ug Mark Abadia aron mo-iskor og 93-89 nga kadaugan batok sa Ave Maria Sanctuary Park ug ingon man magsolo sa liderato sa 1st M. Lhuillier Kwarta Padala-Cebu Basketball Association (MLKP-CBA) basketball tournament didto sa Cebu Coliseum.

Sa sayo pa, gipakuratan sa Talisay City ang mas paboritong Asian College of Technology (ACT) Cyber Knights, 85-81 luyo sa pagmangtas ni Jayford Rodriguez kinsa miburak og 31 puntos.

Si Abadia maoy usa sa instrumento sa maong kadaugan dihang napasulod niya ang iyang off-balanced shot aron hatagan ang Skyblazers og 91-89 nga bentaha sa nahabiling 8.7 segundos, apan pakyas siya pagpasud sa iyang bonus shot human makakubit og foul gikan ni Enrico Llanto sa Ave Maria.

Sa kalit lang nahanaw sa hingpit ang maong damgo human makahimo’g krusyal nga turnover ang Ave Maria.

Ang free throw ni Berame sa nahabiling 2.5 segundos maoy nagselyado sa kadaugan sa Skyblazers.

Si Berame, kanhi sentro sa UV, maoy nangu sa Skyblazers sa iyang 28 puntos samtang si Abadia midugang og 24 puntos.

Si Jercules Tangkay maoy nangu sa Ave Maria (3-1) sa iyang 18 puntos.

Sa laing bahin, ang kadaugan sa Talisay nagtukmod kanila sa ikatulong puwesto sa ilang 2-2 nga baraha, samtang ang Cyber Knights nahagsa ngadto sa 1-3 nahiagom og tulo ka sunod-sunod nga pilde human lang nidaog batok sa Hotel Fortuna sa opening day.

Sa susamang kalamboan, ang CBA organizer ug Cebu City councilor Raul 'Yayoy' Alcoseba mipahibalo nga pormal nilang ilusad ang Jr. CBA atol unya sa press conference diha sa Yayoy's Grill karong adlaw'ng Huwebes sa alas-12 sa udto.

Ang Jr. CBA alang lang sa mga tinun-an sa high school   nga nag-edad og 17 anyos paubos.

PUNTOS MATAG USA

Unang duwa:

Talisay (85) - Rodriguez 31, Lusdoc 13, Belande 8, Bolias 8, Colegado 7, Reyes 5, Mercader 5, Basco 5

ACT (81) - Villaver 20, Nuñez 14, Caputolan 11, Galinato 10, Ursal 6, Akad 6, Sevilla 4, Sampelo 4, Luga 2, Bucao 2, Valencia 2

Ikaduhang duwa:

SCSIT (93) - Berame 28, Abadia 24, Padilla 16, Torion 9, Guangco 4, Garcia 3, Murillo 2, Daculan 2, Doy 2, Labares 2

Ave Maria (89) - Tangkay 18, Amores 15, Dacia 11, Llanto 10, Duran 10, Cainglet 6, Aying 6, Gabas 4, France 2, Alicaway 2, Ocañada 2, Delfino 1   - BANAT NEWS