Gaisano Capital, Ave Maria mag-ilog sa solong liderato

CEBU, Philippines - Nidaog nga mga koponan sa opening day ang  Gaisano Capital-UC Webmasters ug Ave Maria Sanctuary Park-USJR Jaguars ang magtakus alang sa solong liderato sa pagpadayon sa 5th CESAFI Partners' Cup karong gabii diha sa Cebu Coliseum.

Sa sayo pa, ang Rose Aquarius-USPF Panthers ni coach Raul Latonio motilaw sa San Marino Corned Tuna-SWU Cobras.

Ang Gaisano Capital nga gipangulohan sa 6-foot-9   Junemar Fajardo, nidaog batok sa Winner Beef Loaf-CIT Wildcats, 73-62 ug ang Ave Maria naka-ipsot sa Prime Asia-USC Warriors, 70-69 .

Gawas ni Fajardo, ang Gaisano Capital maghangad sab nilang Edward Pao, Luigi Bercede, Robinson Mohammad, Gerald Ampoon ug Quinton Brian Heruela.

Samtang ang Ave Maria magsalig nilang Abulaiz Suliman, Jason Nudalo ug Christian Senining ug pipila sa ilang mga sinaligan.

Kay si coach Edito Salacut na-ejected atol sa Ave Maria-Prime Asia game, mosilbe siya og automatic suspension ug mobalik unya sa Huwebes dihang ilang harungon ang Winner Beef Loaf. - BANAT NEWS