Van system nag-una sa power forty

CEBU, Philippines - Mikulit sa ilang ikaduhang daog ang bag-ong team nga Van System pinaagi sa pagpukan sa FC Fortune sa iskor, 98-91 ug maoy kasamtangan nga nag-una karon sa nagpadayong Power Forty Commissioner’s Cup basketball tournament didto sa Inayawan Sports Complex.

Ang Van System mi-iskor og 84-78 nga kadaogan sa ilang debut kaniadtong Marso 22 batok sa Water Market ug karon aduna nay 2-0 nga baraha. Ilang suwayan pagkulit ang ikatulong daog sunod semana dihang ilang ikasangka ang Allyn Farms kinsa mipakurat sa UTASSCO ni Atty. Flor Yosores, 91-82 sa ikaduhang duwa kaniadtong Martes sa gabii.

Si Fernando Sumargo mipakatap og 37 puntos alang sa Van System. Laing tulo ka kauban ang mi-ayuda kaniya sa opensa aron sab mo-iskor og double figures diin miposa og 18 puntos si Celso Cabaluna, mibahug og 17 puntos si Roger Cabatas ug midugang og 10 puntos si Romeo Montuis.

Sila si Mario Tabar ug Teddy Ebrado parehong miburak og 27 puntos aron pangulohan ang FC Fortune kinsa naghupot na og 1-1 nga baraha.

Sa laing bahin, si Joel Cañete maoy nangu sa Allyn Farms sa iyang 25 puntos samtang sila si Carding Vernaiz ug Ali Cañedo midugang og 17 ug 16 puntos matag usa.

Ang UTASSCO kinsa nagtabla sab sa Allyn Farm sa 1-1 nga baraha, gipangulohan ni Alex Mercado kinsa mimugna og 20 puntos ug parehong miamot og 15 punbtos silang Gideon Bughao ug John Tantay apan napugngan ang ilang scoring leader nga si Wilbor Cabrera ngadto lang sa 11 puntos ug igo lang miamot ug singko puntos si Atty. Yosores.

Karong umaabot Martes, magtigi sab ang parehong pildero nga Water Market ug Park N Go sa ikaduhang duwa diin pareho silang nagtinguha sa una nilang kadaogan.

Puntos matag usa:

First Game:

Van system (98) — Sumargo 37, Cabaluna 18, Cabatas 17, Montuis 10, Labalan 8, Gabuya 4, Cayacap 2, Abarquez 2

FC Fortune (91) — Tabar 27, Ebrado 27, Javierto 17, Caumeran 9, Mapait 6, Piezas 3, Lim 2

Second Game:

Allyn Farms (91) — Cañete 25, Vernaiz 17, Cañedo 16, Tabar 9, Sandal 8, Plarizan 6, Moniva 4, Lisondra 2, Nuñez 2

UTASSCO (82) — Mercado 20, Buhao 15, Tantay 15, Cabrera 11, Yososres 5, Yu 4, Sabejon 4, Ramil 3. (BANAT NEWS)