CEBU, Philippines - Pabilin pa gihapon nga walay pilde ang reigning champion Subangdaku ug Centro sa nagpadayong elimination round sa 4th Mandaue City Mayor's Cup Volleyball Tournament sa miaging gabii didto sa Mandaue Square Plaza.
Ang Subangdaku ug Centro parehong nagbitbit og 3-0 win-loss records.
Ang Subangdaku ni Dino Aribal nidaog sa Looc sa straight sets, 25-18, 25-21 luyo sa mapintas nga pangataki sa ilang first stringers nga si kanhi volleyball varsity stalwarts Roderick Arenasa, Edward Carlo Tecson, Geroel Aragones, Mamerto Dumaog, Aldin Potot ug Ryan Fuentes.
Sa laing bahin, ang Centro miagi una og tulo ka sets sa wala pa nila masakmit ang kulbahinam nga kadaugan batok sa kanhi kampiyon Maguikay.
Ang Maguikay miangkon sa first set, 25-23, apan ang Centro nibawos sa sunod nga set, 25-21 aron mapugos ngadto sa rubbermatch.
Sa ikatulong set mipatigbabaw ang Centro, 25-22 kortesiya nilang Clifford Cafe, Julius Heyrosa, Wendell Alcos ug Adrian Cabahug.
Sa pikas bahin, ang Maguikay lady spikers mibuntog sa Tabok sa straight sets, 25-19, 25-20 pinaagi sa pagmangtas nilang Melanie Espinosa, Mary Joy Cortes ug Novelyn ug Maria Kristina Espina.
Sa laing pang women's action, ang Umapad sa pagpangulo sa inaugural University Students Beach Volley national champion Apple Eve Saraum sa University of Southern Philippines Foundation (USPF), Juriza Arofo Florda Paniel, Rochel Rica ug Leanah Gillera milampurnas sa Ibabao. (BANATSPORTS)