Gilas nakauna sa semis

MANILA, Philippines - Nakabangon ang Gin Kings mula sa isang 19-point deficit sa third period.

Ngunit ang pagdomina ni 6-foot-11 American center Marcus Douthit laban kay 6’3 import Nate Brumfield sa dulo ng fourth quarter ang nagbigay sa Nationals ng isa sa dalawang automatic semifinals berth.

Humugot ang 30-anyos na si Douthit ng 14 sa kanyang game-high 30 points sa final canto upang tulungan ang Smart-Gilas sa 111-104 paggiba sa Ba­rangay Ginebra patungo sa semifinal round ng 2011 PBA Commissioner’s Cup kagabi sa Araneta Coliseum.

Kasabay ng pagtatala ng kanilang ikalawang sunod na panalo, pinigil naman ng Nationals ang four-game winning streak ng Gin Kings.

“PBA got a lot from us on how we play. We also got something from the PBA,” sabi ni Serbian coach Rajko Toroman.

May 7-1 baraha ngayon ang Smart-Gilas kasunod ang Talk ‘N Text ( 6-1), Alaska (5-2), Ginebra (5-3), Derby Ace (4-4), Rain or Shine (3-4), Air21 (2-4), Meralco (2-6), Powerade (2-6) at sibak nang San Miguel (1-7).

Sa likod ng 15 points ni Fil-Am Marcio Lassiter, tumipa ng 3-of-4 shooting sa three-point range, kinuha ng Nationals ang 29-13 lamang sa first period bago palakihin sa 18 puntos, 42-24, ang kanilang bentahe sa Gin Kings sa 7:00 ng second quarter.

Ikinasa ng Smart-Gilas ang isang 19-point advantage, 79-60, sa huling 1:43 ng third period mula sa isang three-pointer ni 6’8 Japeth Aguilar hanggang maibaba ito ng Ginebra sa 84-89 sa 6:37 ng final canto galing kina Mark Caguioa, Willie Miller at Willy Wilson.

Gamit ang kanyang tangkad at lakas, dinomina ni Douthit si Brumfield para ibigay sa Nationals ang 104-95 abante sa huling 47 segundo ng laro na pinalobo pa sa 106-95 buhat sa dalawang freethrow sni Fil-Am Chris Lutz sa natitirang 45.5 segundo na lang.

Tumapos si Lassiter ng 21 points para sa Smart-Gilas.

Smart Gilas 111 - Douthit 30, Lassiter 21, Casio 16, Lutz 15, Baracael 11, Aguilar 10, Slaughter 4, Ramos 2, Barroca 2, Ababou 0.

Ginebra 104 - Brumfield 21, Miller 21, Caguioa 21, Wilson W. 11, Hatfield 10, Labagala 8, Cortez 5, Villanueva 4, Mamaril 2, Tubid 1, Aquino 0, Intal 0.

Quarterscores: 29-13, 52-40, 79-69, 111-104.