CEBU, Philippines - Nagkinahanglan lang og duha ka krusyal kaayong defensive stops ang Marty Pimentel (MP) Customs Brokerage sa naghinapos nga oras sa duwa aron hingpit nga maka-eskapo batok sa CEBAMA Brokers aron mo-iskor og 46-43 nga kadaogan sa main game kaniadtong Sabado atol sa pagbukas sa 1st Cebu Customs United Personeros Association (CCUPA) basketball tournament didto sa barangay Cogon Ramos gym.
Sa primerong duwa, gilampurnas sa MJDL Brokers ang bag-ong miyembro nga Alin Customs Brokerage, 76-61.
Giusikan sa Pimentel ang ilang nuybe puntos nga labaw sa third quarter, 28-19 pipila lang ka gutlo human makapasulod og three-pointer ang anak ni Marty nga si Nikki Pimentel apan hinay-hinay nga mikamang sa unahan ang CEBAMA aron tablahon ang iskor sa 32 pinaagi sa jumpshot ni Dodong Hendive atol sa pagsugod sa fourth period.
Human molabaw og singko puntos ang Pimentel sa kataposang dos minutos, 45-40, misikit pag-usab ang CEBAMA human sa basket nilang Niño Iso ug playing coach Richard Cabrera, 43-45 may 41 segundos ang nahibilin ug sa return play, milampos sa ilang hugot nga depensa ang Pimentel aron pugngan ang CEBAMA paghimo’g attempt ug sa ilang ball possession, nakakubit og foul ang the high-leaping power forward nga si Vincent Pangue kinsa igo lang mi-iskor og usa sa iyang duha ka free throws alang sa 46-43 nga kadaugan.
Si Pangue lang ang bugtong player sa Pimentel nga mihimo’g double figures sa iyang 10 puntos.
Ang duha ka interceptions nga gihimo ni point guard Noel Medalle sa daginutong oras maoy usa sa hinungdan aron masalbar ang Pimentel tungod kay mao kadto’y naghatag nilang higayon aron usikan ang oras ug nakapugos sa CEBAMA paghimo’g foul aron mahunong ang oras apan pareho na silang ubos sa penalty situation.
“Swerte lang mi kay misaler ang among depensa. Delikado nga kontra ang CEBAMA kay mas kusog modagan pero akong tan-aw mas preparado mi kay nila”, matud pa ni Pimentel nga malipayon kaayo samtang naglumpayat ang iyang mga players sa midcourt.
Sa iyang bahin, ang CEBAMA team manager nga si Ricky Rosalejos nagkanayon nga sa ilang gipakitang duwa, aduna na sila’y kapabilidad nga mobawos sa Pimentel atol sa second round.
Si Hendive maoy nangu sa CEBAMA sa iyang 13 puntos apan wala sab siya’y nakuhang suporta sa uban niyang teammates .
Sa sayo pa, si Jaymar Elloren maoy nangu sa MJDL sa iyang 17 puntos samtang sila si Janus Abellana ug Baeng Medalle midugang og 16 ug 15 puntos matag usa.
Ang Alin Brokers gipangulohan ni Ryan Villomo sa iyang 18 puntos samtang ang team owner nga si Israel Alin miposa og 11 puntos ug si Neil Jun Egpit midugang og 10 markers.
Puntos matag usa:
First Game:
MJDL (76)— Elloren 17, Abellana 16, Medalle 15, Cabaltera 11, Jordan 8, Palmero 5
Alin Customs Brokerage (61) — Villomo 18, I. Alin 11, N. Egpit 10, Estorgio 8, Laurel 7, Barral 4, Llevo 2, Egpit 2
Second Game:
Pimentel (46)— Pangue 10, Bensi 7, Arong 6, Miscala 6, Medalle 5, Largosa 3, N. Pimentel 3, Condes 3, Allerite 2, Herbito 1
CEBAMA (43) — Hendive 13, Iso 5, Cabrera 5, Kabigting 3, Oporto 3, Garcia 2, Allan 2, Pareja 2, J. Garcia 1, Tecson 1, Francia 1