Luvendirell, Kakkoii nidaog

CEBU, Philippines - Mikulit sa una nilang daog ang Luvendirell ug Kakkoii sa pagsugod sa United Pusok Balls Club basketball tournament didto sa Pusok basketball court, Lapu-Lapu City.

Ang Luvendirell nakalingkawas sa kulbahinam nga duwa batok sa Rybacek, 61-60, samtang ang Kakkoii naka-eskapo sab bitbit ang 66-63 nga kadaugan batok sa Fe's Lechon.

Gibiyaan og 15 puntos sa halftime, 22-37, ang Luvendirell sa kombinasyon nilang Harie Lopez ug Eyen Suico, hinay-hinay nga mibangon hangtod nga nailog nila ang makutas nga kadaugan.

Si Lopez miburak og 17 puntos, samtang si Suico mibahog og 13 puntos. Nangulo sa Rybacek mao si Joseph Bentula pinaagi sa iyang 18 puntos.

Sa laing bahin, tulo ka players ang mirehistro og double figures alang sa Kakkoii nga igo lang nidaog og tres puntos.

Gipangunahan kini ni Calderon sa iyang 16 puntos, gisundan ni Dela Cerna nga adunay 15 puntos ug Toyugan nga miabuno og 12 puntos.

Ang pilderong Fe's Lechon gipangulohan ni Dindin Linao, kinsa miposa og 14 puntos. Si Joseph Telebangco mitimbre og 10 puntos, samtang ang ilang playing coach nga si Rannie Emperio napugngan ug igo lang mi-iskor og kuwatro puntos.

PUNTOS MATAG USA

Unang duwa:

KAKKOII (66) - Calderon 16, Dela Cerna 15, Toyugan 12, Montefalcon 6, Bregente 6, Diola 4, Emperio 2

FE'S LECHON (63) - Linao 14, Telebangco 10, Pulgo 6, Inot 6, Baguio 6, Montefalcon 5, R. Ybañez 4, R. Emperio 4, J. Ybañez 3, Alecer 3, Retiza 2

Ikaduhang duwa:

LUVENDIRELL (61) - Lopez 17, Eyen 13, Tolero 8, Balnones 6, Allen 6, Chusie 6, Redel 5, Telebangco 2, Remonde 2

RYBACEK (60) - Bentulan 18, McKim 10, Evangelio 8, Casio 6, Jager 6, Abarrientos 6, Shang 3, Coljie 3, Saje 2 (BANAT)