Sinukmagay sa Brgy. Pulangbato karong gabii

CEBU, Philippines - Dose ka paresan sa amateur boxers ang magbinukbukay sa Summit Natural Drinking Water Fight Night Amateur series karong gabii didto sa Pulangbato Sports Complex.

Magsangka sa main event mao si Rhiyan Canillas sa Toledo batok ni Mark Andre Acub sa Antique, Iloilo City sa 62 kgs. division.

Mga boksidor sa University of the Visayas (UV) nga sila si Christian Apawan, Robert Etorma, Rie Muñez. Dann Lou Codilla ug Robert Labanza mokatkat usab sa ring aron ipakita ang ilang katakus sa sinuntokay.

Si Apawan makigharong ni Mark Bernaldez sa Butuan City, si Etorma makigbinukbukay ni Jan Ivor Lastrilla ug si Muñez makigtigi ni Wendel Acharon sa Cabancalan, samtang sila si Codilla ug Labanza mag-unay og sangka ubos sa 52 kgs. division.

Sila si Mark Kevin Soreño, Janriel Jecong ug Ariel Sibay sa Flores Boxing Club mosaka sab sa ring batok nilang Ritchie Montealto, Jeffrey Estella ug Raul Tarona.

Mokompleto sa fight card mao ang sangka ni Jonathan Francisco sa Cabancalan batok ni Rolando Lingaw Lingaw sa Bukidnon, Christian Bacolod batok ni Kevin Jake Catajara, Dominique Casañares batok ni Bebe Rama ug Jun Gabriel Besinga batok ni Joebert Cabaluna. (BANAT)