Daghan na nakaparehistro

CEBU, Philippines - Dul-an sa 100 ka mga batan-ong chess players ang nagparehistro na alang sa ikaduhang hugna sa PMS Chess Club Inc. (PMSCCI) Cup monthly chess tournament karong Domingo diha sa Rabaya St. sa Nonoc, Tabunok sa Talisay City.

Ang usa ka adlaw nga torneyo adunay duha ka kategoriya -- kiddies (elementary) ug juniors (secondary). Mosubay kini og 7-round Swiss system format diin ang matag magduduwa hatagan og 25 minutos pagtapos sa duwa.

Si PMSCCI president Loreo Powao nagkanayon nga ang maong programa laraw nga moagni sa mga kabatan-onan sa Talisay City nga mogahin sa ilang bakasyon sa pagkat-on og pagduwa'g chess, inay mabuang sa sugal ug sa mga duwa sa computer.

Aduna kini registration fee nga P30 alang sa juniors ug P20 sa kiddies category. Ang mga partisipante kinahanglang magdala sa ilang school ID atol sa registration ug sa adlaw sa duwa.

Ganting salapi, tropeyo ug medalya ang madawat alang sa top eight placers sa matag dibisyon.

Gawas ni Powao, miabag usab sa katumanan sa maong torneyo sila si PMSCCI board of director Nestor Nacario, PRO Engr. Noel Sumalinog, Board of Director Engr. Danilo Penarada ug Tabunok chapter vice president Joy Sabejon uban sa suporta ni Tabunok Brgy. Capt. Manuel Cabriana.  (BANATSPORTS)