2011 SPEEDO Triathlon series gitakda
CEBU, Philippines - Magdugok na usab ang mga top local ug international triathletes dinhi sa Sugbu alang sa third leg sa 2011 SPEEDO National Age Group Triathlon Series karong Abril 3 didto sa Plantation Bay Resort and Spa sa Lapu-Lapu City.
Ang umaabot nga lumba nga manukad sa lagoon area sa Plantation Bay naglatid og 1km. swim, 30km. bike ug 7.5km run.
Si Danao City Councilor ug Triathlon Association of the Philippines (TRAP) official Oscar 'Boying' Rodriguez Jr. mitug-an nga ang mga langyaw'ng triathletes nga nisalmot sa Xterra Philippines Championship didto sa lungsod sa Liloan, mipadayag sa ilang partisipasyon.
Sa iyang bahin, si Lapu-Lapu City councilor Harry Radaza mipahibalo usab nga sirhan nila ang pipila ka dalan sa siyudad alang sa seguridad sa partisipante.
Dugang pa ni Radaza nga sa maong lumba ilang mapakita ang ilang kaandam sa pagpahigayon og triathlon race, ilabi na nga nagplano silang mopasiugda og Tri Lapu-Lapu 113 international triathlon.
Ang registration fee nagkantidad og P500 alang sa individual, samtang P1,500 sa 3-man relay ug P1,000 alang sa 2-member relay.
Ang deadline sa registration karong Marso 25. Ang organizers modawat usab og late registrants, apan daku na ang mabayran.
Ang registration areas nahimutang diha sa Speedo sa Ayala Center-Cebu ug sa Speedo SM City-Cebu. (BANAT)
- Latest
- Trending
