MANILA, Philippines - Patunayang isa sila sa dapat na katakutan sa liga ang pakay ng RnW Pacific Pipes sa pagbangga nila sa Black Water sa pagpapatuloy ng PBA D-League Foundation Cup ngayon sa The Arena sa San Juan City.
Sariwa ang bataan ng bagitong head coach na si Topex Robinson mula sa 76-72 panalo laban sa PC Gilmore na nangyari sa pagbubukas ng liga noong Marso 12.
“Makasaysayan na ito sa amin dahil kauna-unahang team kami na nanalo sa liga. Pero hindi kami dapat makontento at ang panalo ay nagpapatunay na palaban kami sa D-League,” wika ni coach Robinson.
Ang Cobra Energy Drink ay sinisipat ding lagukin ang 2-0 karta sa Group B laban sa Powerade sa ikalawang laro alas-4 ng hapon.
Papasok ang tropa ni coach Lawrence Chongson buhat sa 78-70 tagumpay sa Maynilad Water Dragon na nangyari rin sa unang araw ng kompetisyon at kung makukuha ay solong pangungunahan ang kanilang grupo.
Si Paul Lee na gumawa ng 26 puntos ang siyang sasandalan uli ng Ironmen laban sa Powerade na binubuo ng UP players at magbabalak na bumangon buhat sa 89-74 pagkakadurog sa FCA Cultivators.
Sasandal naman si Robinson sa mga beteranong sina Jim Viray at Vic Manuel para igiya ang koponan sa pangalawang dikit na panalo at makasalo sa liderato sa Group A na kasalukuyang hawak ng Pharex Bidang Generix.