Ave Maria naka-eskapo sa Talisay City

CEBU, Philippines - Nagtusak-tusak nga itsa ni Alex Cainglet maoy gigamit nga hinagiban sa Ave Maria Sanctuary Park sa pag-eskapo bitbit ang 98-96 nga kadaugan batok sa Talisay City sa 1st M. Lhuillier Kwarta Padala-Cebu Basketball Association (MLKP-CBA) season didto sa USC-main gym.

Sa maong kadaugan, ang Ave Maria nagtabla na karon sa liderato uban sa Salazar Colleges of Science and Institute of Technology (SCSIT) Skyblazers, kinsa miposte sab sa ilang ikatulong sunod-sunod nga daog gikan sa mga kamot sa Hotel Fortuna, 81-66.

Si Mark Abadia maoy nagmangtas sa maong duwa diin mipakatap siya'g 30 puntos aron pangulohan ang Skyblazers.

Nabiyaan og otso puntos ang Ave Maria sa halftime, 54-46, apan kalit nga nanginit si Cainglet, kinsa mipasud og tulo ka triples sa third period, lakip na ang buzzer-beating halfcourt heave.

Si Cainglet miposa og 15 puntos ug maoy miduslit sa rally sa Ave Maria sa final period diin ilang gisakmit ang labaw, 80-74 ug wala na kini molingi pa sukad niadto.

Si Jercules Tangkay maoy topscorer sa Ave Maria sa iyang 22 puntos ug si Danny Aying midugang og 20 puntos. Si Enrico Llanto miamot og 13 puntos, samtang si Gerry Cavan mitampo og 11 puntos.

Ang Talisay City gipangulohan nilang Jayford Rodriguez ug Celso Colegado Jr. nga adunay 21 ug 20 puntos matag usa.

PUNTOS MATAG USA

Ave Maria (98) - Tangkay 22, Aying 20, Cainglet 15, Llanto 13, Cavan 11, Ocañada 7, Amores 6, Alicaway 2, Delfino 2

Talisay City (96) - Rodriguez 21, Colegado 20, Reyes 13, Basco 8, Lusdoc 8, Bolias 5, Belande 4, Sereño 4, Mercader 2, Malinao 1 - BANAT NEWS