Yaw-Yan ArDigma summer clinic sugdan sa Abril 4

CEBU, Philippines - Nagsugod na'g pagpanawat og mga tinun-an ang Yaw-Yan Ardigma Martial Arts Federation alang sa ilang summer clinic nga gikatakdang sugdan karong Abril 4 diha sa 4th floor sa Coast Pacific Downtown Center sa dalan Sanciangko, atbang sa UC-main campus.

Gikan sa pulong nga "Sayaw ng Kamatayan" (Dance of Death), ang Yaw-Yan nailhan isip usa sa mga orihihal nga Filipino martial arts nga gimugna ni Grand Master Napoleon 'Nap' A. Fernandez. Ang maong matang sa martial arts unang gitudlo niadtong 1972 didto sa Sta. Cruz, Manila.

Ang Yaw-Yan Ardigma usa ka all out martial arts nga mogamit sa lawas isip hinagiban ug motudlo sa mga tinun-an og saktong paggamit sa sukmag, patid, siko, tuhod ug ground fighting isip self defense.

"Amo mao ang pag-agni sa mga kabatan-onan nga magtuon og self-defense dungan usab ang pagpabilin sa kapiskay sa panglawas karong panahon sa bakasyon inay mosulod sa bisyo sama sa gidili nga drogas," matud   ni Master Benigno 'Ekin' R. Caniga Jr., CEO ug founder sa Yaw-Yan Ardigma Cebu.

Lakip usab sa mga kurso nga pilian mao ang arnis, boxing, fitness, Yaw-Yan ArDigma System ug Mixed Martial Arts (MMA).

Alang sa dugang kasayoran, mahimong motawag sa 09198215582 ug 09327316232.   - BANAT NEWS