Kings itatagay ang kanilang win no. 3

MANILA, Philippines - Sinasakyan ang isang two-game winning streak,hangad ng Gin Kings na masolo ang ikatlong puwesto.

Sasagupain ng Barangay GInebra ang bumubulusok na San Miguel nga­yong alas-6:30 ng gabi sa elimination round ng 2011 PBA Commissioner’s Cup sa Araneta Coliseum.

Maghaharap naman sa unang laro sa alas-4 ng hapon ang Rain or Shine at Air21.

Tinalo ng Gin Kings ang Express, 99-86, at Power­ade Tigers, 107-92.

“We’re still not pla­ying well. Hopefully, we can get there as we play San Miguel, Rain or Shine and Talk ‘N Text. Mabigat ‘yung stretch na ‘yon,” sabi ni coach Jong Uichico sa Gi­nebra.

Tangan ng Smart-Gilas Pilipinas ang liderato sa kanilang matayog na 5-0 kartada kasunod ang Alaska (4-1), Talk 'N Text (4-1), Ginebra (3-2), Rain or Shine (3-2), Derby Ace (2-4), Powerade (2-4), Air21 (1-3), San Miguel (1-4) at Meralco (1-4).

Muling ibabandera ng Gin Kings ni Uichico sina import Nate Brumfield, Mark Caguioa, Willie Miller, Ronald Tubid at Rico Villanueva.

Itatapat naman ng Beer­men ni Ato Agustin si­na import David Young, Jay Washington, Arwind San­tos, Alex Cabagnot, Ra­beh Al-Hussaini at No­noy Baclao.

Kasalukuyang nasa isang three-game losing slump ang San Miguel, natalo sa Talk ‘N Text sa nakaraang PBA Philippine Cup championship series.

Huling natalo ang Beer­men sa Tigers, 91-98, no­ong Marso 16.

Sa unang laban, pipilitin naman ng Elasto Painters ni Yeng Guiao na pigilan ang kanilang dalawang sunod na kamalasan sa pakikipag­sagupa sa talunan ring Express ni Bong Ramos.

Matapos magposte ng mataas na 3-0 baraha, dalawang sunod na kabiguan ang natikman ng Rain or Shine, kasama na rito ang 94-99 pagyukod sa Smart-Gilas noong Biyernes.

Apat na sunod na ka­biguan naman ang pagmumulan ng Air21.

Huling nanalo ang Express, pinanggalingan nina Guiao, Al-Hussaini at Bac­lao, sa Beermen, 92-87, noong Pebrero 25.

At matapos ito ay apat na sunod na kamalasan ang nalasap ng Air21.