CEBU, Philippines - Giandam na ni WBC Youth Intercontinental flyweight champion Milan 'El Metodico' Melindo ang iyang kaugalingon alang sa usa ka gira ibabaw sa ring batok ni Rosendo 'El Matador' Vega karong gabii sa main event sa "Pinoy Pride 4: Philippines vs. The World" diha sa Waterfront-Cebu City Hotel and Casino.
Miangkon si Melindo nga nahagit siya human nadungog ang pasiatab ni Vega nga wala siya'y abilidad nga mo-iskor og knockout. Matud ni Melindo nga dili niya tugotan si Vega nga mobabag sa damgo niyang world title fight batok ni IBF flyweight titlist Moruti Mthalane sa South Africa.
"Pasagdan lang nako siya nga mosulod kay piti gyud siya," matud pa ni Melindo atol sa official weigh-in kagahapon didto sa The Events Centre sa SM City-Cebu. "Mas ready pako ug nikusgan itandi sa last nako nga fight kontra ni (Carlos) Tamara."Gipakita ni Melindo (23-0, 7KOs) ang iyang grabeng kondisyon dihang sayon ra niyang gikuha ang 112 lbs., itandi ni Vega (17-6, 11KOs) kinsa nagkinahanglan pa nga mopagaan og duha ka pounds aron makuha ang weight limit nga 112 lbs.
Si Melindo, 23-anyos namahayag nga dili igo ang pila ka buwan nga ensayo aron mohimo og impresibong daog tungod kay kinahanglan usab niya ang dakung suporta gikan sa mga Cebuano boxing fans.
"Mangayo unta ko'g suporta sa atong mga kababayan ug sa ilang presensiya sa away aron moabiba," dugang ni Melindo.
Sa laing bahin, paninguhaon usab ni AJ 'Bazooka' Banal (23-1, 18KOs) nga dili makawang ang tulo ka buwan niya nga todo-ensayo pinaagi sa pagpukan sa Tanzanian nga si Francis 'Black Panther' Miyeyusho (29-8-2, 17KOs).
"Di nako usikan akong training ug kong makakita og higayon tumbahon gyud nako siya," matud pa ni Banal, kinsa diriyot makigsumbagay ni Miyeyusho atol sa weigh-in.
Gipasidan-an usab sa chief trainer ni Banal nga si Edmund Villamor si Miyeyusho nga dili makig bell-to-bell sa iyang boksidor aron dili kini sayong matumba ibabaw sa ring.
"Aw kun makigsinukliay jud siya, di gyud siya magdugay ni AJ," matud ni Villamor, kinsa mitagna sa away nga matapos sa lima ka rounds.
Sa supporting bout, si ALA knockout artist ug reigning OPBF flyweight king Rocky Fuentes (29-6, 18KOs) manalipod sa iyang bakus pinaagi sa knockout batok ni Indonesian Jemmy Gobel (15-7, 12KOs).
Puno sab sa aksiyon ang undercard bout tali nila ni WBO AsPac bantamweight champion Kenichi 'Machine Gun' Yamaguchi (16-1, 4KOs) ug Marjohn Yap (14-5, 7KOs) ug Canadian prospect Steve 'The Dragon' Claggett (11-0, 6KOs) batok ni Romeo Jakosalem (11-4-2, 5KOs). (BANAT NEWS)