Melindo, Banal miangkon og kadaugan

CEBU, Philippines - Duha ka masaarong Filipino fighters sa ALA Gym nga sila si Milan 'El Metodico' Melindo ug AJ 'Bazooka' Banal, nangahas nga pildihon ang ilang tagsa-tagsa ka langyaw'ng kaatbang sa "Pinoy Pride 4: Philippines vs The World" karong Sabado sa gabii diha sa Waterfront Cebu City Hotel and Casino. 

Atol sa final press conference kagahapon didto sa Aegian room sa Waterfront, si Melindo (23-0, 7KOs) ug si Banal (23-1, 18KOs) nagkakita sa labing unang higayon sa ilang kaatbang nga si Mexican Rosendo 'El Matador' Vega (17-6, 11KOs) ug Tarzanian Francis 'Black Panther' Miyeyusho (29-8-2, 17KOs).

"Di ko mo-underestimate niya kay nag-training pud siya pareha nako, pero magbantay lang gyud siya kay desidido ko mohimo og knockout," matud pa ni Melindo.

Apan ang Mehikanong si Vega dili kombinsido sa gipanulti ni Melindo nga mo-iskor og knockout.

"I just did not come here to collect my purse because I trained hard for this fight and I’m ready to get big win against Melindo," matud pa ni Vega.

Sama sa iyang stablemate, si Banal mibahad usab nga   iyang pildihon si Miyeyusho sa sayong bahin sa away aron ipakita sa iyang boxing fans ug ingon man sa iyang mga kritiko nga siya ang tinuod nga nidaog human sa iyang controversial disqualification nga kadaugan batok ni Luis Alberto Perez sa "Pinoy Pride 1" niadtong Oktubre sa miaging tuig.

 "Paningkamotan nako nga mahuman mig dali, pero di sad pasabot nga magdali-dali ko sa away," matud pa ni Banal.

Sa supporting bout, si ALA knockout artist ug reigning OPBF flyweight king Rocky Fuentes (29-6, 18KOs) giatngan nga mo-iskor og laing impresibong knockout batok ni Indonesian Jemmy Gobel (15-7, 12KOs).

Ang Japanese WBO AsPac bantamweight champion nga si Kenichi 'Machine Gun' Yamaguchi (16-1, 4KOs) tinguha usab nga modaog batok sa taga-Cagayan de Oro nga si Marjohn Yap   alang sa iyang yutang natawhan nga   naigo sa linog ug tsunami.

Lain sab nga masaarong Canadian prospect Steve 'The Dragon' Claggett (11-0, 6KOs) makigbinukbukay sab batok ni Romeo Jakosalem (11-4-2, 5KOs)

Ang official weigh-in himuon karong alas-11 sa buntag diha sa SM City-Cebu event center. (BANAT NEWS)