Pepo Rubi mipupo duha ka titulo

CEBU, Philippines - Dili kamahayan ang pagbiya ni Pepo Rubi pag-host sa sports event sa usa ka local television tungod kay sa iyang pagbalik sa aksiyon, gipan-an dayon kini og duha ka titulo sa 3rd leg sa 2011 MS Motosuit Motocross Series niadtong Domingo didto sa Barangay 8 sa Tuburan, Cebu.

Ang beteranong si Rubi nga taud-taud na nga nawagtang sa eksena sa motocross, mihari sa expert ug intermediate division ning maong lumba nga giuloha'g Barangay Captain Fredo Diamante Motocross Competition.

Nagsunod ni Rubi sa expert category mao sila si Kimboy Pineda ug Juvenile Abellar, samtang sila si Clark Wagas ug Cyril Tariman maoy mi-okupar sa ikaduha ug ikatulo nga dapit sa intermediate class.

Wala hinuon masirohi sila si Pineda ug Tariman human sila nidominar sa tagsa-tagsa nila ka kategoriya. Si Pineda naghari sa pro division batok nilang Abellar ug Rex Barbaso. Si Tariman mao sab ang naghari sa novice open production, gisundan ni Gutsy Bayawa ug Ryan Paghasi-an.

Ang top three sa local enduro mao sila si Jay Sanico, Donkey Sanchez ug JC Obligado. Apan gipilde ni Sanchez si Sanico sa open enduro aron maangkon ang kampiyonato. Si Alex Abalo mipahiluna sa ikaduha.

Sa beginners open production, si Bayawa maoy nihari batok nilang Enting Realiza ug Rolly dela Calzada nga mipahiluna sa ikaduha ug ikatulong dapit.

Ang top three sa executive A mao sila si Roscel Gungob, Siegfred Ornopia ug Jun Enriquez, sa executive B mao sila si Bobby Minorias, Manuel Jamolod ug Enriquez, samtang sa executive C mao sila si Jamolod, Flint Concha ug Noli Rom.

Giharos sa mga Pepito ang unang tulo ka dapit sa peewee nga giharian ni BJ, gisundan nilang Jude ug Reggie.

Mipatigbabaw sab sila si Jongee Basco sa mini class. Gipilde niya sila si Rib-Rib Pepito ug Brylle Ornopia.

Samtang sa pantra, ang top three mao sila si Jojen Mollena, Glen Ebo ug Vincent Tundag. - BANAT NEWS