CEBU, Philippines - Mobida na ang napulo ka paresan ka mga batan-ong boxing prospect sa labing unang hugna sa “Buhay Boksingero” sa GMA-7 karong gabii didto sa Inayawan Sports Complex.
Unang musungasong sa four round nga binukbukay mao si Delmar Cabatos sa Sta.Cruz gym batok RJ Gonzales sa RWS stable, sundan ni JR Salvador sa Phil-Aust Boxing Club (PABC) batok Jobert Alvarez sa Donaire stable.
Si Jessie Dignos sa T.I Cebu moatubang ni Reymund Fermin sa PABC, samtang ang stable mate ni Dignos nga si Ronoel Pael mo-away ni Gelbert Magos sa RWS Gym.
Laing T.I Gym boxer nga si Jherpaul Valero mosangka ni Julito Catubay sa RWS Stable, si Jerome Baja sa PABC mosangka ni Romil Cruz ug si Memar Dula sa Sta.Cruz makigbinukbukay ni Jessie Rosales sa SGG stable.
Mokumpleto sa boxing card mao ang sangka nila ni John Edu Torbiso sa PABC batok ni Bobbie Sentillas sa T.I Cebu , Anecito Dondon Gesta batok ni Rodel Wenceslao sa PABC ug Jejito Imbo batok Leonard Nicanor.
Masaksihan usab ang eight round bout nga dili kabahin sa tournament, diin musangka si Marco Singwangcha batok ni Daryl Amuncio, samtang si Noel Aldemita moatubang ni Sherwin Manatad. (BANATSPORTS)