Pajo belles kampiyon sa Shakey's volleyball

CEBU, Philippines - Nakuha og balik sa Pajo National High School (PNHS) belles ang trono nga nahanaw sa miaging tuig, apan miagi pa kini'g makutas nga duwa sa wala pa nila hinginli ang reigning Milo Little Olympics regional champion University of San Jose-Recoletos (USJ-R) spikers, 3-1 aron maghari sa 8th Shakey's Girls Volleyball League Visayas qualifying sa miaging adlaw didto sa Aznar Coliseum.

Ang PNHS miangkon sa unang set, 25-18, apan ang USJ-R mibawos sa ikaduha, 25-16 aron mapatas ang duwa, 1-1.

Apan mao ra kadto ang konsolasyon sa USJ-R kay ang PNHS miharos sa sunod nga duha ka sets, 25-17, 25-13.

Sa maong kadaugan, ang PNHS nakaangkon og katungod aron maoy morepresentar sa region alang sa Shakey's Girls Volleyball League national finals nga uloha'g "Tournament of Champions" karong Abril 3 didto sa Bacolod City.

Sa sangka sa ikatulo, ang University of Southern Philippines Foundation (USPF) mipilde sa Catmon Elementary School, 25-22, 24-26, 25-18. (BANAT NEWS)