Act Cyber Knights miluhod sa Ave Maria SP

CEBU, Philippines - Walay nakapiog kang Enrico Llanto sa ilawom, samtang ang beteranong si Jercules Tangkay nakahatag sab og dugang kadasig sa Ave Maria Sanctuary Park pagpaluhod sa Asian College of Technology (ACT) Cyber Knights, 78-73 aron masakmit ang solong liderato sa 1st M.Lhuillier Kwarta Padala-Cebu Basketball Association (MLKP-CBA) basketball tournament niadtong Domingo didto sa Cebu Coliseum.

Si Llanto, kinsa nakatabang og daku dihang ang Ave Maria ni-outscored sa Cyber Knights sa final period, 26-14 mihakot og mga puntos ug kasagaran niini gikan sa undergoal nga nakapadaghan og fouls ngadto sa mga higante sa Cyber Knights.

Kanhi sinaligang player sa USC Warrior, si Llanto maoy topscorer sa Ave Maria sa iyang 25 puntos. Nangigo sab si Llanto sa free throw line diin miposa siya'g 13 sa 18 ka tira.

Si Tangkay, kinsa maoy miduslit dihang ang Ave Maria mi-rally gikan sa 12 puntos nga alkanse sa first half, mibahog og 24 puntos. Si Alano Caputolan mao sab ang nangu sa ACT pinaagi sa iyang 13 puntos. Sila si Abe Galinato ug Michael Luga miamot og 11 puntos matag usa, gisundan ni Robert Villaver nga adunay 10 puntos. (BANAT NEWS)