Gardner hari sa XTERRA

CEBU, Philippines - Ang Briton nga si Sam Gardner ang migawas nga labing paspas sa makasaysayanong Xterra Philippine Championship Off-Road Triathlon kagahapon didto sa Amara Subdivision sa Liloan, Cebu.

Sa nagmalampusong labing dakung international triathlon nga gipahigayun dinhi sa Sugbu, ang 35-anyos nga si Gardner mao ang miangkon sa korona dihang iyang gihuman ang makutas nga lumba sulod sa duha ka oras, 25 mintuos ug 59 segundos.

Bisan pa og beterano na sa mga international marathon, miangkon si Gardner nga kato na ang labing lisud nga lumba nga iyang gisalmutan tungod sa lisud nga terrain ubanan sa grabeng kainit.

Hinuon, mapasalamaton si Gardner sa mga abiba sa mga crowd lakip na ang mga lumulupyo diha sa Liloan nga maoy nakahatag kaniya og dakung kadasig nga tiwason ang lumba.

“The people are cheering for me and that kept me going,” matud pa ni Gardner. “I’ll definitely go back here next year to defend my title.”

Sa iyang bahin, si Shonny Vanladingham kinsa nagsunod ni Gardner sa oras nga 2:31.39 maoy gibayaw nga reyna sa women’s pro open, samtang ang kanhi kampiyon nga si Renata Bucher sa Switzerland maoy ikaduha sa oras nga 2:33.35.

Gihatagan usab og dungog sa taga-Cagayan De Oro nga si Neil ang nasud dihang siya maoy migawas fourth over-all ug second placer ni Gardner sa oras nga 2:39.34.

Naunhan ni Catiil ang kampiyon sa Xterra South Africa nga si Karena Waste sa oras nga 2:42.03 alang sa ikatulong dapit sa women’s pro.

Milusot usab ang laing mga bisaya nga sila si George Vilog sa Davao ug former RP Ironman king Noy Jopson alang sa Filipino category.  - BANAT NEWS