CEBU, Philippines - Laing duha ka bag-ong teams ang mikulit og daog sa una nilang duwa sa 3rd F. Llamas Youth Association (FYA) basketball tournament didto sa Sitio Manggahan open court sa Brgy. Punta Princesa, ning siyudad.
Sa pasiunang duwa, ang OMKI Megavolts naka-eskapo bitbit ang 58-54 nga kadaugan batok sa Matthew, samtang ang Ernest Jay mi-iskor sab og daog batok sa Orillaville, 63-58.
Bugtong si Loloy Orbita lang ang nakahimo'g double figures alang sa Megavolts sa iyang 12 puntos.
Si Dodong Cabigas miposte og 19 puntos, gisundan ni Danny Cañete sa iyang 10 puntos alang sa Matthew.
Sa laing duwa, si Toper Limbaga ug Maclean Alcueno mi-iskor og 18 ug 12 puntos matag usa alang sa Ernest Jay ni team owner Baeng Medalle.
Ang kanhi UC Webmasters off-guard nga si Daniel Enriquez ug Bunot Taboada maoy nangu sa Oraville nga adunay 14 puntos matag usa.
Ang torneyo sa FYA gipaluyohan ni kanhi Punta Princesa barangay captain Rolly Diorico, uban ni barangay councilor Boy Atillo nga nagsilbeng tournament director. (BANATSPORTS)