Mamiit pakyas

CEBU, Philippines - Wala kapugong ang naglagiting nga kainit sa adlaw sa engkuwentro tali sa Philippines ug Japan sa pagbukas sa Davis Cup Asia-Oceana Zone Group 1 tie kagahapon didto sa Plantation Bay Resort and Spa.

Sa maong duwa, pakyas ang Team Pilipinas pagkutlo og daog human ang beterano ug RP team captain nga si Cecil Mamiit napilde ngadto ni Tatsuma Ito sa Japan, 3-2 sa ilang singles match sa unang adlaw sa Davis Cup.

Taliwala sa makabungog nga abiba sa liboan niya ka mga kababayan, gipakita ni Mamiit ang hugot niyang tinguha nga sugdan ang kampanya sa Pilipinas pinaagi sa pagkulit og daog.

Human niya maangkon ang first set, nagbanos-banos sila pag-angkon sa set hangtod nga miabot ang duwa sa ikalima ug deciding set. Apan si Ito maoy nakahutay sa duwa aron maangkon ang daog.

Bisan pa sa maong kapildihan, gibati gihapon og garbo ang tibuok Team Pilipinas tungod sa nindot nga duwa ni Mamiit.

Giangkon ni Ito nga naglisud siya ug gibati'g kakulba ato sa maong sangka ni Mamiit.

"I didn’t expect this match to be very long.The last time we (him and Mamiit) played lasted for only three and a half hours. But since it’s a clay court, the rally is very long, makes the game very long," matud pa ni Ito.

Masaligon si Mamiit nga makabawi sila karong adlawa sa doubles category sa ilang pambato nga sila si Cebuano Johnny Arcilla ug Elbert Anasta.

Likayan sa Pilipinas nga mausab ang pait nilang gidangatan atol sa miaging Davis Cup didto sa Japan diin gisirohan sila sa host team Japan, 0-5. (BANATSPORTS)