Yap andam na sa Pinoy Pride 4

CEBU, Philippines - Dili lalim ang atubangon ni Marjohn Yap sa Cagayan de Oro City sa iyang pakigsangka batok ni Kenichi 'Machine Gun' Yamaguchi sa ilang 8-rounder undercard bout sa "Pinoy Pride 4: Philippines vs. The World" karong Marso 19 diha sa Waterfront Cebu City Hotel and Casino.

Bisan pa niini, si Yap, ang no. 11 sa RP bantamweight ranking nagbitbit og rekord nga 14-5, 7KOs andam na nga makigbinukbukay ni Yamaguchi, ang reining WBO Asia-Pacific super bantamweight champion nga adunay 15-1, 4KOs.

Sama sa Canadian prospect nga si Steve Clagett, si Yamaguchi mopakita sab og nindot nga away aron makuha ang usa ka fighting contract gikan sa ALA Promotions.

Kun mahitabo kini, si Yamaguchi makig-uban sa iyang kababayan ug kanhi stablemate nga si two-time world champion Katsunari Takayama nga una nang mipirma og kontrata sa ALA Promotions.  (BANATSPORTS)