CEBU, Philippines - Naibot ang ngipon ni Rain or Shine Elasto Painters forward Doug Kramer atol sa kadaugan diin naangkon nila ang 2-0 nga baraha batok sa Meralco Bolts, 101-92, kagabii didto Araneta Coliseum.
Si Kramer kinsa maoy gibayaw nga “Best Player of the Game” sa iyang 11 puntos ug siyam ka rebounds, misaysay nga aksidenteng natang-tang ang iyang ngipon human maigo atol sa inilogay sa rebound batok sa mga bigmen sa Meralco.
Pakyas si Diale
Wa musalir ang kaisog sa Pinoy boxing challenger nga si Arden Diale dihang sayun ra siyang gipaundang ni Mexican champion Julio Cesar Miranda pinaagi sa second round KO alang sa WBO flyweight title kagahapon didto sa Mexico.
Orcullo hari sa World 8-Ball
Milampos ang Filipino cue master nga si Dennis “Robocop” Orcullo sa pag-angkon sa titulo sa World 8-Ball Championship dihang iyang gipukan ang Dutch nga si Neils Feijen, 10-3 sa finals didto sa Fujairah Exhibition Center in Fujairah United Arab Emirates.
Si Orcullo mapatik karon sa kasaysayan sa billiards isip usa sa mga Pinoy pool champions uban nila ni Efren “Bata” Reyes ug Ronnie Alcano, Alex Pagulayan, Rubilen Amit ug Francisco “Django” Bustamante.
Rios misakmit sa WBA title
Mikulit og impresibong knockout nga kadaugan ang Mexican bad boy nga si Brandon “Bam Bam” Rios dihang iyang gipatumba sa round 10 si Miguel Acosta sa Venezuela aron sa pagsakmit sa WBA lightweight title kagahapon didto sa Las Vegas.
Si Rios naila isip suod nga higala ni Antonio Margarito ug sparmate ni Nonito Donaire Jr., ang tulo pulos bata ni Mexican legendary coach Robert Garcia.
Ilakip si Washington sa trade
Kini ang hangyu sa mga basketball analyst aron dili maalkansi ang Air21 kun ugaling maplantsa na ang giplanong blockbuster trade kanila ug sa San Miguel Beermen.
Nasayran nga plano sa San Miguel nga ihatag sila si Danny Seigle, Mick Pennissi ug Joseph Yeo didto sa Air21 bugti sa top 3 pick nga sila si Noy Baclao Rabeh Al-Hussaini, ug Rey Guevarra. - BANAT NEWS