Igimax suportado sa LAZER Bike helmets

CEBU, Philippines - Mosalmot og duha ka mountainbike competition ang teen cycling sensation ug SAC awardee nga si Luis Miguel 'IgiMax' Maximo karong weekend.

Lab-as pa gikan sa pagsakmit niya sa kampiyonato sa relay category sa Dayo Bros Triathlon niadtong Sabado didto sa Catmon uban sa iyang teammates sa Springdale nga sila si Alex Qui ug RJ Lao, si Maximo mopakita na pod sa iyang kapaspas sa Cebu Cycling Criterium Road Race didto sa North Reclamation Area, sa Mandaue City.

Batok sa mga seasoned cyclists sa Sugbu, si Maximo migawas nga third placer sa Men's Open Category C sa Sinulog Criterium sa miaging buwan sa mao gihapon nga binyu.

Ugma, si IgiMax makiglumba sa ipahigayong V12 Radgear MTB Race 2011 didto sa Sityo Caimbol sa Brgy. Tisa, ning siyudad.

Masukod ang abilidad ni Maximo sa iyang pagsalmot sa cross-country event gamit ang entry-level basic nga mountainbike nga mas bug-at sa naandang biseklita nga iyang gamiton.

Sa laing bahin, ang LAZER Bike helmets, usa ka nabantog nga helmet manufacturer nga tua magbasi sa nasud sa Belgium usa na sab nga mopaluyo sa Igimax. (BANATSPORTS)