Green Coil milangkat sa 1st Keiz BJ Cup title

CEBU, Philippines - Sangko sa langit ang gibating kalipay sa Green Coil cagers human makaipsot sa kulbahinam nga duwa batok sa Keiz BJ Motorsales, 60-57 sa Game-2 sa ilang "best-of-three" final series ug aron usab masakmit ang titulo sa 1st Keiz BJ Inter-Company basketball tournament niadtong Miyerkules sa gabii didto sa Barangay Tabok gym, Mandaue City.

Napanglantawan nang daan ni Keiz BJ team owner Siegfred Ornopia nga maharos gyud ang iyang team gumikan kay gawas nga pulos batan-on ang Green Coil, nag-abot sab ang mga alas.

Sayong nanginit ang Keiz BJ kortesiya sa duha ka sunod-sunod nga puntos ni Jervie Ermac ug Amboy Atiga, aron moposte'g 6-0 nga bentaha.

Apan inay maluya, ang Green ni coach Carlito Simbajon kalit milusad og rally sa second period aron ilogon ang labaw, 11-10 sa tira ni Ramon Rago sa nahabiling 2:27 sa maong kuwarter.

Sinukliay sa puntos maoy nahitabo sukad niadtong tungora hinungdan nga nagbanos-banos kini pag-angkon sa labaw hangtod nga natapos ang first half sa iskor nga 29-25, pabor sa Keiz BJ ni team owner Siegfred Ornopia.

Nalansang ang iskor nga Keiz BJ sa sayong bahin sa third period dihang ang Green Coil mihimo sa naandan nilang full court trapping defense uban sa pagpatuasik og mga puntos aron makabentaha og singko puntos, 29-34.

Sa kahigpit sa aksiyon nagtabla sa makapito ka higayon ang duwa ug ang katapusan sa iskor nga 55-all sa katapusang 1:09 sa free throws ni Athan Ariza sa Keiz BJ kay nagmangtas man si Eugenio Tampus, kinsa maoy topscorer sa Green Coil pinaagi sa iyang 17 puntos.

Mahatod unta ang duwa ngadto sa overtime dihang ang Green Coil igo lang milabaw og dos puntos sa nahabiling 11 segundos, 59-57, apan mikagar ang dul-it nga itsa ni playing coach Mulo Gonzaga.

Ang free throw ni Rago maoy mikandado sa kadaugan sa Green Coil. Si Rago ug Crisanto Montibon parehong miamot og 12 puntos matag usa.

Sa laing bahin, nakaginhawa pa ang Prospeed ni coach Nante Cueva human ilang gipilde ang MS Motosuit ni Lou Ornopia, 56-52 sa kaugalingon nilang "best-of-three" alang sa ikatulong dapit.

Si Renante Jubay maoy nangu sa Prospeed nga mibulit og 20 puntos, gisundan ni Kapal Gomez sa iyang 17 puntos ug Jack Jubay nga adunay 15 puntos.

Ang pilderong MS Motosuit gipangulohan sab ni Felip Recto nga adunay 11 puntos, sila si Roldan Bacunawa ug Egonio miamot og 10 puntos matag usa.

Sila si Jerry Narandan ug Shorneil Patalinghug maoy nireperi sa mga duwa, samtang table officials mao sila si JC Narandan ug Bores Acompañado. (BANATSPORTS)