"Pinoy Pride 4" gitakda karong Marso 19

CEBU, Philippines - Duha ka masidlakong boksidor sa ALA Boxing Gym ang mabutang na usab sa pagsuway batok sa tagsa-tagsa nila ka mga langyaw'ng kaatbang sa "Pinoy Pride 4" nga gitakda sa Marso 19 diha sa Waterfront-Cebu City Hotel .

Paga-bidahan nila ni Milan 'El Metodico' Melindo ug AJ 'Bazooka' Banal, ang maong boxing card nga uloha'g "Philippines vs. the World," usa lang sa mga dagkung boxing events nga giandam sa ALA Promotions ug ABS-CBN Sports karong tuiga.

"Putting AJ and Milan in one card will surely capture the interest of boxing fans all over the world," matud pa ni ALA Promotions president Michael Aldeguer   sa press conference kagahapon didto sa Moon Café sa Asiatown I.T Park.

Lab-as pa sa impresibo niyang kalampusan batok ni former world champion Carlos Tamara niadtong Nobiyembre, si Melindo (23-0, 7KOs) mosungasong sa labing importanteng away sa iyang karera batok sa Mehikanong si Rosendo 'Matador' Vega (17-6, 11KOs).

Kun molampos si Melindo, i-presentar siya ni Aldeguer ngadto sa IBF aron paawayon isip mandatory challenger alang sa IBF flyweight title nga kasamtangang gihuptan ni South African Moruti Mthalane.

Sa iyang bahin, human sa kontrobersiyal niya nga disqualification win batok ni Luis Alberto Perez niadtong Oktubre sa Pinoy Pride 1, si Banal (23-1, 18KOs) mamawi karon sa iyang mga boxing fans pinaagi sa pagkulit og impresibong daog batok ni Tanzanian super flyweight king Francisco 'Black Panther' Miyeyusho (29-8-2, 17KOs).

“Chance na gyud ni nako og ako gyud ipakita nila (iyang mga kritiko) ang nindot nako nga duwa, pinaksitay gyud ning awaya," matud sa taga-Ermita nga si Banal.

Sa main supporting bout, si OPBF flyweight champion Rocky 'The Road Warrior' Fuentes (29-6, 18KOs) modepensa sa iyang titulo batok sa Indonesian   Jemmy 'Boom Boom' Gobel (15-7, 12KOs).

Duha ka   langyaw'ng boksidor ang magpasikat sab aron makakawat og atensiyon   sa ALA Promotions. (BANATSPORTS)