Adlawan nanghawod sa Liloan Motocross

CEBU, Philippines - Ang awardee sa 29th Sportswriters Association of Cebu-San Miguel Brewery (SAC-SMB) All-Cebu Sports Awards nga si Jonjon Adlawan maoy nangu sa mga mananaog sa 2nd leg sa 2011 MS Motosuit Motocross Series nga giluoha'g 10th Hon. Brgy. Capt. Manuel Wagas Motocross Cup niadtong Domingo didto sa Sitio Tuburan, barangay Jubay-Liloan, Cebu.

Napuhalan ni Adlawan si Kimboy Pineda alang sa titulo sa experts division, samtang si Clark Wagas mi-okupar sa ikatulo.

Hinuon, si Adlawan nalandig sa ikatulo sa pro nga gidominar ni Juvenil Abellar. Si Pineda mipahiluna gihapon sa ikaduha.

Nabulahan sa maong lumba mao si Donkey Sanchez, kinsa midaog og duha ka titulo.

Si Sanchez naghari sa local enduro, gisundan ni Salmer Longakit ug Moner Lantingan alang sa ikaduha ug ikatulo nga dapit.

Gidominar sab ni Sanchez ang open enduro batok nilang Rap-Rap Marquez ug JC Obligado.

Si Paul Inoc maoy mipatigbabaw sa intermediate class, gisundan nila ni Clark Wagas ug Cyril Tariman.

Mibalik na sab ang naandang katakus ni Siegfred Ornopia dihang iyang gisakmit ang titulo sa executive A class. Gisundan siya ni Nelson Sicad ug Nonoy Reluya.

Naghari sa executive B, mao si Jun Enriquez ug gisundan nilang Nonoy Reluya ug Nelson Sicad. Si Butch Flores maoy mipatigbabaw sa executive C human niya gipilde si Jerry Sicad. Si Jonathan Cuyos maoy mikapyot sa ikatulo.

Mipatigbabaw sab si Omar Sabal sa beginners open production batok nilang Salmer Longakit ug Ryan Paghasan.

Si Cyril Tariman maoy naghari sa novice open production. Sila si Ryan Querol ug Whelbert Tariman nalandig sa ikaduha ug ikatulo nga dapit.

Sa underbone division, si Ronel Salde maoy midaog sa kampiyonato batok nilang JR Gualisa ug Willy Borces.

Sila si Jougee Basco, BJ Pepito ug Brylle Ornopia maoy top three winners sa mini class. Samtang sila BJ Pepito, Froilan Tariman ug Ken Ornopia mao sab ang miangkon sa nag-unang tulo ka luna sa peewee category.

Nagmalampuson ang maong kalihukan tungod sa pagpaluyo ni Mayor Duke Frasco ug sa   barangay officials sa Jubay, Congressman Raymund Mendoza, Kein Rich Development Inc. ug Norkis-Sunriser. (BANAT NEWS)