CEBU, Philippines - Nailog na karon sa bisitang FIDE master Sander Severino ang liderato human sa unom ka hugna nga aksiyon sa 1st Bombi Aznar Memorial Open Chess Tournament didto sa Elizabeth Mall Activity Center.
Si Severino sa Bacolod City, nagtabla uban ni Johnnel Balquin sa Misamis Oriental nga parehong nakahipos og 5.5 puntos.
Sa pagka karon, si Balquin nahimutang sa ikaduhang dapit, gisundan ni IM Kim Steven Yap, NM Merben Roque ug Venancio Loyola.
Nalakip sa top 10 mao sila si NM Rogelio Enriquez, Rhobel Legaspi, Ernesto Marquez, Harold Diano ug Richard Abangan.
Ang kampiyon mobulsa og P20,000. Ang second placer makadawat og P10,000, samtang ang third ug fourth placers makaangkon og P5,000 ug P3,000 matag usa.
Ang torneyo gimugna agi'g pahinungod sa mipanaw na nga National Master ug Cebu Sports Hall of Famer Engr. Matias 'Bombi' B. Aznar III.
Gipasiugdahan kini sa Rose Pharmacy Chess Club uban sa suporta sa Southwest Finance Corp., Lapu-Lapu Rural Bank Inc. ug Rural Bank of Matag-ob (Leyte), Inc. (BANATSPORTS)