"The Flash" Nonito daog sa Round Two

CEBU, Philippines - Wala man unta’y bisan usa ka lungag sa atup sa Mandalay Bay Hotel and Casino didto sa Las Vegas, Nevada apan mga bitoon sa mabugnaw’ng kagabhi-on ang nakita ni Fernado Montiel ug ingon man usab mga aninipot ang mi-alirong kaniya samtang siya naghayang ug daw gipatol dihang mikirig kini sa makadiyot human maigo sa naghaguros nga kinumo ni Filipino Flash Nonito Donaire atol sa ikaduhang hugna sa ilang world title showdown sa WBC/WBO bantamweight division.

Wala damha ni Montiel nga ingon niadto kabantok ang kumo ni Donaire nga mitugpa didto sa iyang aping. Sa first round, saba pa kaayo ang mga Mexicans nga supporters ni Montiel ug mas misaba dihang nagsugod na ang ikaduhang hugna.

Mga kumbinasyon nga wala dinhe wala didto maoy gibuhian ni Donaire ug nagpungasi nga suntok maoy nakatumba ni Montiel nga kalit lang nahapla sa canvass nga nagtupong ang tiil.

Gusto pa gyud unta siyang mobangon apan pipila lang ka segundos sa iyang tinguha nga padayonon ang away, daling milayat ang referee nga si Russell Mora aron paglikay sa dugang kulata nga segurado unta niyang mahiagoman. Natapos ang sangka sa 2:25 sa second round ug laing Pinoy ang naghupot karon sa kampiyonato sa natad sa boxing.

Bisan tuod ug tataw nga mas paborito nato si Donaire apan wala gyud kita magtuo nga matapos ang away sa ingon ato kadali. Samtang daw nagdala og atsa ang kinumo ni Donaire, ingon lang sa gamitoy nga kutsilyo and hinagiban ni “Cochulito” nga maoy angga ni Montiel.

Human sa iyang ika-26 nga daog diin mirehistro siya’g 18 ka knockouts uban sa tulo ka pilde sa 47 ka away, magpa-abot na lang karon si Donaire kung kinsay sunod magpakulata kaniya sulod sa ring.

Lain na sab unya nga blockubuster fight ang atong masaksihan sa dili pa matapos kining tuiga kun ugaling aduna may mangahas pagbabag sa iyang dalan.

Congrats Nonito!!!

* * *

Masaksihan karong buntaga ang ika-60 nga East vs. West NBA All-Star Game didto sa balwarte ni Kobe Bryant sa Staples Center sa Los Angeles, California.

Tinguha sa East nga depensa-an ang ilang korona dihang midaog sila sa miaging tuig ug tres puntos, 141-139 diin maoy bayani si Cgris Bosh sa dihang didto pa siya moduwa sa Toronto Raptors.

Lain na sab nga tilimad-on nga modaug ang East tungod kay si James Jones nga taga Miami Heat maoy nahimong kampiyon sa three-point shootout ug sa Rookie Challenge sa miaging adlaw, nahimong MVP ang taga East nga si John Wall sa Washington Wizards kinsa mikulit og Rookie Challenge record nga 22 ka assists ug mipapas sa karaang record nga nahimo ni Chris Paul sa New Orleans Hornets sa iyang rookie season.

Hinoon sab, taga West maoy nahimong kampiyon sa Slam Dunk diin ang paboritong si Blake Griffin sa Los Angeles Clippers mipukan sa iyang mga kontra nga sila si DeMar DeRozan sa Toronto, JaVale McGee sa Washington ug si Serge Ibaka sa Oklahoma.

Ang taga West nga si Stephen Curry kinsa sakop sa Golden State Warriors maoy kampiyon sa Skills Challenge.

Karon nga nag-ipon na silang LeBron James, Dwyane Wade, Derrick Rose, Amare Stoudemire ug Dwight Howard sa East, misamot kini kalig-on ilabi na kay pagasuportahan man sila ni Kevin Garnett, Paul Pierce, Ray Allen ug Rajon Rondo sa Boston Celtics, ang numero unong team sa East.

Si Kobe maoy mangu sa West uban kanilang Kevin Durant, Carmelo Anthony, Tim Duncan, Cris Paul ug paga-abagan nilang Pau Gasol, Dirk Nowitzki ug lain pang mga pambato gikan sa West.

Miscellaneous. Congrats to the members of the Sportswriters Association of Cebu for the very SAC-cessful affair last Saturday at the Ayala Activity Center during the awarding rites of the top Cebuano and Cebu-based athletes who carved a name for themselves in the various sports disciplines. Belated fiesta to the people of sitio NABA, Alaska, Mambaling yesterday in honor of patron Birhen sa Lourdes. Also belated birthday greetings to my six-year-old niece Dezza Karyl P. Narvasa yesterday where she tendered a children’s party at the Jollibee-Banawa branch.My friend Julian Macoy has a new house in Pleasant Homes subdivison in barangay Punta Princesa and is looking for somebody to rent it for P15 thousand a month. He guarantees safety and great privacy to the location that is ideal to working couple and is conducive to those students who wants a peaceful environment to concentrate on their studies.  - BANAT NEWS