Jones sa 3-pt shootout, Griffin hari sa Slam Dunk

CEBU, Philippines - Gibaraw ni James Jones sa Miami Heat ang mga pambato sa Boston Celtics nga sila si Paul Pierce ug Ray Allen aron maoy mahimong kampiyon sa 3-point shootout kaniadtong Sabado didto sa Staples Center sa Los Angeles, California.

Si Jones kinsa midaog sa korona sa labing unang higayon, mi-iskor og 20 puntos sa final round diin nahurot niya’g pasulod ang lima ka bola pinaagi sa iyang maanindot kaayong shooting stroke. Matod pa ni Jones nga nadasig siya dihang siya maoy unang gipatira atol sa three-man final diin nawagtang ang iyang pressure.

Bisan pa og si Pierce maoy defending champion ug si Allen bag-o lang nahimong NBA career leader sa 3-pointers, wala kanilang duha ang naka-apas ni Jones atubangan sa mga Lakers’ fans nga mi-boo kanila.

Sa sayo pa, si Stephen Curry sa Golden State Warriors midaog batok kang Russell Westbrook sa Oklahoma City aron mahimong kampiyon sa Skills Challenge ug ang tulo ka players sa Atlanta Hawks maoy midaog sa Shooting Stars competition nga maoy labing bag-ong event nga gipasiugdahan sa NBA.

Si Jones maoy ika-upat nga player sa Heat nga nahimong kampiyon sa 3-point shootout human ni Glen Rice (1995), Jason Kapono (2007) ug Daequan Cook (2009).

Bisan og nakatabla lang si Jones og 15 ka triples karon nga season, respetado siya sa NBA. Misuway siya’g 259 ka tirada alang sa Miami karon nga season ug ang 220 niini mga 3-point attempts diin nakahimo siya’g 42.3 por- siyento.

Pipila lang hinoon ang nagtuo nga iyang mapukan sila si Pierce ug Allen nga maoy labing inilang outside shooters sa kasaysayan sa NBA.

Si Pierce maoy nahimong kampiyon sa miaging tuig didto sa Dallas ug bisan pa sa mga boos nga dili makatugot nga ang usa ka taga Los Angeles magsul-ob og uniporme sa Celtics, wala mausab ang iyang kumpyansa.

Si Allen maoy kampiyon kaniadtong 2001 ug iya nang nalabawan si Reggie Miller sa career record sa iyang 2,561 ka 3-pointers niadtong Pebrero 10 didto sa TD Garden diin napilde sila sa Lakers.

Si Allen maoy nangu sa first round sa iyang 20 puntos samtang si Jones misikit sa iyang 16 puntos. Si Pierce milabaw batok kang Dorell Wright sa Golden State sa kataposan niyang money ball aron mo-abante sa finals sa iyang 12 puntos.

Si Kevin Durant sa Oklahoma City kinsa maoy NBA scoring champion sa miaging season ug kasamtangang scoring leader, sayong natagak dihang igo lang siyang nakahimo’g sayis puntos sa first round sa iyang 5 of 25 shots.

Nakapasulod ug upat sa lima ka money ball nga adunay dos puntos si Jones sa final round ug mihimo’g 16 of 25 shots overall. Si Pierce mi-iskor og 18 puntos apan misipyat sa iyang kataposang money ball aron unta motabla kang Jones sa 20 puntos samtang natagak si Allen sa iyang 15 puntos.

Ang maong kumpetisyon gilamasan dihang midaog ang paboritong si Blake Griffin sa Los Angeles Clippers sa Slam Dunk contest.

Si Curry miduwa sab sa Rookie Challenge niadtong Biyernes diin napilde ang iyang Sophomore Team, 140-148 alang sa Rookies. Iyang gipuhalan silang Westbrook nga lumad sab nga taga Los Angeles, Deerick Rose, Chris Paul ug si John Wall kinsa maoy Rookie Challenge MVP.

Gilingaw ni Griffin ang nagpunsisok nga fans didto sa Staples Center nga mitambong sa gi-ilang pinakasadya nga All-Star weekend sa NBA. Si Griffin kinsa moduwa sab alang sa West All-Star karong buntag, mi-iskor og 14 puntos alang sa midaog nga Rookies.

Si Griffin maoy labing unang rookie sa All-Star sunod kang Yao Ming niadtong 2003 pinaagi sa iyang impresibong debut sa Clippers.

Si Griffin nga kanhi forward sa Oklahoma, nag-average og 22.8 puntos ug 12.6 ka rebounds apan mas nailado siya tungod sa iyang mga makapakurat nga abilidad sa dunk diin nagsagol ang kaabtik ug kakusgan.  - BANAT NEWS