8 ka players kalipikado sa Cebu hall of fame

CEBU, Philippines - Labing menos walo ka kanhi mga inilang players sa basketball nga nakahatag og dakong dungog sa Sugbo sa international ug lokal competitions ang kalipikado nga mahimong umaabot nga nominado ngadto sa Cebu Sports Hall of Fame diin ang uban kanila nahimong sakop sa Philippine Team samtang ang uban mga kanhi PBA players kinsang team nahimong kampiyon.

Nag-una sa mga nominado mao si Ramon Manulat kinsa kanhi sakop sa Philippine Team nga mirepresentar didto sa Melbourne Olympics ug sa 1954 World Basketball Championships sa Brazil diin ang Pilipinas maoy nakakuha sa ikatulong pwesto, ang labing taas nga nakuha sa atong nasud sa natad sa international competition. Iyang naka-uban sa team kanhi mao sila si “Big Difference” Carlos Loyzaga ug si Lauro “The Fox” Mumar.

Ang laing mga nominado mao sila si Ildefonso Señas, sakop sa Philippine Team kinsa miduwa didto sa Cambodia, Ernesto Morales, sakop sa Philippine Team didto sa Barcelona, Jessie Sullano, sakop sa 1st Youth Asian Games, Ernesto “Estoy” Estrada, kanhi membro sa Asian Youth, Alejandrito “Dodie” Miego, kanhi PBA star nga nagduwa sa San Miguel, Alfonso Marquez, kanhi PBA star nga nagduwa sa Seven-Up ug si Siegfredo Fuentes nga kanhi sab nagduwa sa Seven-Up.

Nominado sab ang kanhi track and field champion nga si Aquilino Llenos kinsa nahimong sakop sa Philippine Team nga mi-representar didto sa Far East Olympics niadtong 1927.

Isip labing maayo ug labing lig-on nga team human sa World War II, ang kanhi winningest team dinhi sa Sugbo nga mao ang 1946 University of San Carlos (USC) Team kinsa maoy labing unang kampiyon sa National Inter-Collegiate Championship, nomindao sab sa Hall of Fame.

Ang first batch Hall of Fame awardees nga sila si basketball legend Julian Macoy ug kanhi two-time Olympian nga si Joaquin Rojas. Sr. maoy miduso sa maong nominasyon aron paghatag og dungog sa kanhi nila mga kauban ug mga kaila dinhi sa Sugbo ug gani, andam silang mohatag ug dugang impormasyon kung imbitahon sa umaabot nga mga tigum sa mga sakop sa Hall of Fame screening committee.

Mipahigayon og salo-salo sila si Macoy ug Rojas uban sa mga kanhi sakop sa 1956 USC champion team nga gipangulohan sa ilang captain ball nga si Atty. Danilo Deen.

Ang uban nga mitambong mao sila si retired Justice Christopher Lock, ang kanhi Supreme court administrator, Atty. Baldomero C. Estenzo, Dean sa UC college of Law, Vic Colina, Nilo Velasquez, Arsenio Solon, Bobby Barria ug Raul Reyes.  - BANAT NEWS