CEBU, Philippines - Gipanglupig sa mga Kenyan ang mga elite local runners sa gipahigayun sa SM 2 SM Run kagahapon sa buntag didto sa SM City- Cebu carpark sa may North Reclamation area.
Ang mga Kenyan nga sila si Benjamin Kipkazi, Susan Jemutai ug Willy Potich maoy migawas nga kampiyon sa tulo ka major division sa lumba human nila gipangpukan ang mga Cebuano runners.
Si Kipkazi ang hari sa miaging Cebu City Marathon miposte og laing daog, ning higayuna batok sa beteranong si Eric Panique sa 21k men’s class. Gitapos ni Kipkazi ang lumba sulod sa usa ka oras, 10 minutos ug 8.128 segundos.
Samtang si Panique mipahiluna sa ikaduhang dapit sa oras nga 1:10.54.163 ug si Anthony Nerza sa Davao misakiyo sa ikatulo sa oras nga 1:12.46.535.
Sa iyang bahin, nakabawus si Jemutai ngadto sa teen running sensation nga si Mary Joy Tabal sa Southwestern University (SWU) dihang giangkon niya ang titulo sa women’s division sa oras nga1:29.20.004.
Human niya giapsan si Jemutai sa miaging Cebu City Marathon, si Tabal nahagsa ngadto sa ikaduhang dapit sunod sa Kenyan sa oras nga 1:29.32.637.
Mipwesto sa ikatulong dapit si Mary Grace Delos Santos sa oras nga 1:29.57.542.
Wa misalir si Mendel Lopez (40:14.350) dihang giapsan siya sa Kenyan nga si Potich (39:50.37) alang sa top spot sa men’s 12k race. Si Jordan Bacong ang third placer sa oras nga 40:50.350
Migawas nga reyna sa women’s category si Madelyn Carter sa oras nga 51:01.400, gisundan nila ni Jojelyn Pepito (51:02.760) ug Alyssa Lagahit (53:42.870) sa ikaduha ug ikatulong dapit. - BANAT NEWS