Ycong, Homecillo nanghawod

CEBU, Philippines - Pambato sa Southwestern University (SWU) nga si Jorry Ycong maoy nanghawod sa 5K men’s open sa Run for Hearts of Gold kagahapon didto sa Chong Hua Medical Arts parking area.

Tungod sa pagpalta sa mga top runners, nakapatuyang og maayo si Ycong, kinsa mitapos sa oras nga 18:35.995 aron langkaton ang titulo.

Si Chris Consolacion nga mi-oras og 20:59.404 mipahiluna sa ikaduha, gisundan ni Daniel Cardenas alang sa ikatulo sa iyang 22:46.457.

Sa women’s division, si Leslie Joyce Homecillo maoy miangkon sa korona sa   oras nga 27:48.560. Iyang gipilde silang   si Nimfa Lazaga (32:13.259) ug Grace Cardenas (32:21.237) nga mi-okupar sa ikaduha ug ikatulo nga mga dapit.

Gawas sa mga professional runners, midagan usab ubos sa 5K ang hospital staff sa Chong Hua Medical Center.

Sa Anesthesia category, si Brian Belandres (27:19.860) ug Emily Estrada (29:42.042) ang migawas nga mga mananaog, samtang sila si Aldritz Tagimacruz (27:25.317) ug Patricia Gay Pangilinan (52:21.854) ang nanghawod sa Admin category.

Sila si Sherwin Mirafuentes (24:29.284) ug Heidi Hernandez (47:23.810) maoy mipatigbabaw sa Ancillary division, samtang si Weda Lim ang nanghawod sa OB class sa oras nga 31:03.751.  (BANATSPORTS)