Green Coil milubong sa RMO Motor Parts

CEBU, Philippines - Teamwork ug determinasyon maoy yawi sa kadaugan sa Green Coil dribblers nga milubong sa RMO Motor Parts sa double-knockout quarter-semis sa 1st Keiz BJ Inter-Company Basketball Tournament niadtong Biyernes sa gabii didto sa barangay Tabok gym sa Mandaue City.

Ang Green Coil nagkinahanglan na lang og usa ka daog ug kun modaog sila sa ilang duwa ugma batok sa Pro Speed Racing, hingpit na nilang makuha ang lingkoranan sa semifinals.

Ang Green Coil milabaw lang og tres puntos paghuman sa unang 10 minutos sa duwa, 17-14, apan sila si Buddy Payla, Marvin Branzuela ug James Rosal, nagpuli-puli'g pamunit og mga puntos aron tunolan ang ilang koponan og singko puntos nga abante sa halftime, 29-24.

Giinat sa Green Coil ang ilang labaw ngadto sa 11 puntos, 45-34 pinaagi sa duha ka sunod-sunod nga fastbreaks nilang Payla ug A. Daño sa nahabiling 1:33 sa third quarter.

Nakapanimaho na og sayong kadaugan ang Green Coil dihang miburot ang labaw ngadto na sa 12 puntos sa sayong bahin sa final period, 50-38 human sa tira ni Rago.

Si Payla maoy nangu sa Green Coil nga misansan og 14 puntos. Lain tulo ang miugkat og double figures. Si Branzuela mitimbre og 13 puntos, si Rago mitimang og 12 puntos, samtang si Rosal mitikdol og 10 puntos.

Ang naparot nga RMO gipangulohan sab ni Raymond Capada pinaagi sa iyang 20 puntos.

Sa pasiunang duwa, ang Keiz BJ Motor ni team owner Siegfred Ornopia naka-eskapo bitbit ang 50-49 nga kadaugan batok sa Bosenn, 50-49 sa Ornopia's league special event).

Si D.I. Nellas, kinsa mipasud sa iyang labing importanteng itsa gikan ni Siegfred Ornopia maoy nagdalag daog sa Keiz BJ. Si Nellas mi-iskor og 16 puntos, samtang si Michael Perez miabuno og 12 puntos.

Nangulo sa pilderong Bosenn mao si Edmar Cueva, kinsa milabyog og 21 puntos.

Ang maong torneyo usa sa mga highlight sa tinuig nga kapistahan sa Batang Hesus Señor Sto. Niño sa Barangay Pagsabungan karong Pebrero 26. (BANATSPORTS)