Cavs' record 24 ka pilde

CEBU, Philippines - Mikulit og bag-ong losing record nga 24 ka pilde ang Cleveland Cavaliers, ang labing taas nga losing streak sa kasaysayan sa NBA.

Ang maong panghitabo masakit ug maka-uuwaw kaayo alang sa Cavs kinsa mitabla sa record sa Denver ug Vancouver nga 23 ka pilde sa miaging adlaw ug karon nag-inusara na sa labing ngil-ad nga record diin nahitabo sab kanila kaniadtong 1982 season tungod kay niadtong higayona, wala sila makatilaw og daog gikan sa Marso 19 hangtod ngadto sa Nobiyembre 10 sa nahisgotang tuig.

Ang maong ngil-ad nga kapalaran gitawag sab nga NBA’s record for futility.

Naangkon sa makalolo-oy nga Cavs ang record human sila mapilde kagahapon sa Portland Trail Blazers, 105-111 didto sa ilang homecourt sa Quicken Loans Arena sa Cleveland, Ohio. Wala pa modaog ang Cavs sa tuig 2011 kinsa napilde na og 34 sa 35 ka duwa.

“It feels like a bad dream,” maoy nahimong reaksiyon ni Daniel Gibson, ang point guard sa Cavs kinsa kataposang midaog kaniadto pang Nobiyembre 27 batok sa Memphis Grizzlies, 92-86 didto sa Quicken Loans Arena.

Nagsugod sila’g kapilde didto sab sa ilang homecourt dihang midaog ang Utah Jazz, 101-90 kaniadtong Disyembre 20, 2010 ug gikan niadto, padayon silang nangamote hangtod nga naghupot na sila karon og 8-42 nga baraha – usa ka makalibog nga hunahuna-on alang sa usa ka team nga midaog og kapin 60 ka duwa sa miaging duha ka seasons ug milungtad pa’g dugay sa playoffs.

Niadtong mga higayona, didto pa kanila moduwa si LeBron James nga karon mibalhin na ngadto sa Miami Heat. Karon nga wala na siya, nagkapuliki na’g ihap sa ilang pilde ang Cavs.

“We have to figure out how to win these games,” matod pa ni Gibson kinsa miposa og 12 puntos uban sa iyang siyam ka assists. “We just have to keep trying until we do. It’s not a matter of if, but when. We have to continue to play the way we’re playing and things are going to change for us,” padayon pa niya.

Apan dihang gipangutana siya kanus-a kaha modaog sila’g usab, si Gibson mitubag “the next game, hopefully,” he said. “That’s the way you have to approach it.”

Sila si Anrawn Jamison ug Ramon Sesions maoy nangu sa Cavs sa ilang 17 ug 15 puntos alang sa Cavs kinsa naglaum nga putlon ang ilang pagdailos batok sa Dallas ugma ug dayon makigsangka sila batok sa Detroit, LA Clippers ug sa Washington didto sa ilang homecourt.

Sa laing duwa, gipakalma sa Golden State ang Chicago, 101-90 gilubong sa Oklahoma ang Utah, 121-105, midaog ang Denver batok Minnesota, 113-110, giligsan sa Detroit ang Milwaukee, 89-78, midaog ang Atlanta batok sa Washington, 99-92, midaog ang Dallas batok sa Charlotte, 101-92, midaog ang LA Lakers batok sa New Orleans, 101-95 ug naka-eskapo ang Houston batok sa Memphis, 95-93 sa overtime. - GGM gikan sa NBA.com (BANAT NEWS)