CEBU, Philippines - Panahon na sa mga beginners ug novice chess players sa Talisay ug sa unang distrito sa Sugbu sa pagpakita sa ilang abilidad sa pagbukas sa Barangay Bulacao Fiesta Chessfest nga sugdan ugma didto sa Bulacao Gym sa Brgy. Bulacao, Talisay City.
Gibahin sa tulo ka kategoriya -- senior class B, juniors ug kiddies, ang duha ka adlaw nga torneyo mosubay sa 7-round Swiss system format diin ang mga magduduwa hatagan og 25 minutos aron tapuson ang matag duwa.
Ganting salapi, tropeyo ug medalya ang madawat sa top eight placers sa matag kategoriya.
Ang maong torneyo pasiuna lang sa naglaray nga chess tournaments nga pasiugdahan sa Powao Machine Shop (PMS) Chess Club Inc. ubos sa pagpangulo sa ilang presidente nga si Loreto Powao. Lain pang mga opisyales sa Powao mao sila si Rowell Campaner (vice president), Marvin Bucao (secretary), Engr. Carlos Tan (treasurer) ug sila si Loreto Albert Lacaron ug Keres Bucao (PROs).
Ang board of directors naglakip nilang Engr. Danilo Peñaranda, Nestor Nacario ug Hon. Romulo Cabuenas.
Si Tabunok barangay captain Hon. Manuel 'Maning' Cabriana maoy adviser. (BANATSPORTS)