Rollway Brokerage batok JJTS-ORYA sa LLBA-Rollway Cup

CEBU, Philippines - Laraw sa Rollway Customs Brokerage ni team owner Rolly de la Pieza nga mokulit sa ikaupat nilang daog sa ilang pakigsangka batok sa JJTS-ORYA sa main game sa pagpadayon sa LLBA-Rollway Cup basketball tournament karong gabii didto sa Villas Magallanes gym sa Sta. Lucia Property sa Lapu-Lapu City.

Sugdan ang sangka sa alas-8 sa gabii human sa sambunot tali sa Lheo Auto Shop ug Igot Trucking nga gikatakda sa alas-7 sa gabii.

Dili lisud ang laraw sa Rollway ang pagkutlo og daog kay pupareha man sila og kalidad sa duwa nga nabatonan sa JJTS-ORYA. Ang Rollway sa pagka karon adunay 3-2 win-loss record, samtang ang JJTS-ORYA nagbitbit og 4-2 nga baraha.

Ang Rollway magsalig sa abilidad nilang Centes Brañanola   Amay Palad, Uriel Manilag ug team owner Rolly de la Pieza.

Sa laing bahin, ang Lheo Auto Shop pangulohan sa ilang team owner Leo Almacin, uban nilang Arman Lamoste, Celso Igot, Rene Cuadra, Noli Paquibot. Samtang ang Igot Trucking pangulohan sab sa ilang team owner Junar Igot. Mangayo sab kini og suporta nilang Lito Magat, Michael Ouano, Renren Igot, Edgardo Lungay ug Ryan Ceniza. (BANAT NEWS)