CEOBSA nakadepensa sa ilang titulo

CEBU, Philippines - Milampos ang Cebu Equine Owners, Breeders and Sportsmen Association (CEOBSA) pagdepensa sa ilang titulo sa bag-o lang natapos nga 4th Governor's Cup Horse Show and Competition National Open niadtong Domingo didto sa north reclamation area sa Mandaue City.

Human misakmit og lima ka bulawan atol sa opening day, ang CEOBSA riders mipalapad sa ilang kampanya dihang milangkat kini og laing tulo ka titulo sa obstacle race.

Si Francis Miñoza naghari sa intermediate division nga mi-oras og 1:08.04. Iyang gipilde si Derby Casinabe sa Malaybalay Horsemen sa oras nga 1:10.51, samtang si Jun Dumaquita nalandig sa ikatulo sa oras nga 1:13.05.

Laing duha ka korona nga nalangkat sa CEOBSA naggikan nilang Alyssa Lawrence ug Kyle Mole sa ladies ug youth divisions.

Si Earl Jan Ebora sa Malaybalay maoy naghari sa expert division sa oras nga 1:05.71. Ang pambato sa Davao Horse Club nga si George Misa mi-okupar sa ikaduhang dapit sa oras nga 1:08.21, samtang si Mamart Mercado sa CEOBSA nalabay sa ikatulo nga mi-oras og 1:09.26. (BANAT NEWS)