Smart Gilas gi-mapya?

Mialisngaw karon ang pasangil sa pagpanikas atol sa kontrobersiyal nga. 75-84, nga kapildehan sa Smart Gilas Pilipinas sa mga kamot sa Al Etihad Egypt sa finals sa 22nd Dubai Invitational Cup didto sa Al Ahli Indoor Stadium sa Dubai, UAE.

Ang Gilas yanu ra kaayung gilubong sa higanteng mga player sa Egypt kini human na-eject ang naturalized citizen nga si Marcus Douthit tungod sa pagkalambigit niini sa lamok-lamok batok sa Egyptian import nga si Dareen Kelly.

Apan si Gilas assistant team manager Butch Antonio nagkanayon nga nasagmuyo sila sa ejection ni Douthit kinsa igo ra nga mibawus human gisiko ug gilamparo ni Kelly sa pagsugud sa opening period.

Bisan pa og napalagpot usab si Kelly, naglibug ang coaching staff sa Gilas tungod kay wala sila hatagi og penalty shoots gikan sa duha ka technical fouls nga gitawag sa referee ngadto sa Egypt .

Gireklamo usab sa Gilas ang wala paghatag og technical foul sa referee ngadto sa mga bench players sa Egypt nga mihasmag ngadto sa korte atol sa kagubot.

‘During the altercation, the Egyptian players rushed into the court, which is a clear bench-clearing, but no technical foul was given for doing so,” dugang pa ni Antonio.

Sa pagkawala ni Douthit, miabaga sa opensa mao si Mac Baracael nga miposa og 28 puntos alang sa Gilas nga misaka og usa ka tikang gikan sa ilang third place finish niadtong miaging tuig.