CEBU, Philippines - Milangkat og tulo ka titulo ang defending champion Cebu Equistine Owners, Breeders and Sportsmen's Association (CEOBSA) sa pagsugod sa 4th Governor's Cup National Open Championship kagahapon didto sa north reclamation area sa Mandaue City.
Ang duha ka titulo naggikan sa show jumping category kortesiya nilang Angel Abalos ug Annie Loren, samtang ang laing titulo nakuha ni Alyssa Loren sa barrel race.
Nakuha ni Alyssa Loren ang ladies title sa barrel race category human niya mapilde si Rhea Pelaez ug teammate Annie Loren.
Sa laing bahin, si Annie Loren, nakabawi ug maoy nanghawod sa Class-A category sa show jumping event pinaagi sa pagpilde nilang Josh Mita sa Davao ug Stewart Shure sa
CEOBSA.
Si Angel Abalos sa CEOBSA miangkon sa titulo sa kiddies division sa mao gihapon nga event dihang iyang napuhalan silang
Dave Mahestrado sa Impasugong ug Keannu Dela Cerna sa Malaybalay, Bukidnon.
Sa Class-B, si Amor Mahestrado sa Impasugon miangkon sa title, gisundan ni Andy Tan sa Davao ug Alyssa Loren sa CEOBSA alang
sa ikaduha ug ikatulo nga dapit.
Lain pang mga mananaog sa show jumping event mao sila si Ethan Pelaez sa kiddies division ug Jam Ebura sa youth division.
Napulo ka horse clubs ang misalmot ning tuiga nga magtigi sa nagkadaiyang kategoriya -- horse barrel race, obstacle race, oval ug show jumping race sa tulo ka dibisyon nga naglakip sa novice, expert ug kiddies. (BANATSPORTS)