CEBU, Philippines - Gidemolis sa Powerade Tigers ang Meralco Bolts, 122-109 aron pag-angkon sa ikaduhang dapit sa Cebu City Mayor's Cup Invitational kagabii didto sa Cebu Coliseum.
Bisan og usa lang ka tune-up match alang sa nagsingabot nga PBA second conference, gipakita sa duha ka koponan ang hugot nilang tinguha nga modaog ug nakita sa ilang pisikal nga duwa nga diriyot miresulta sa lamok-lamok.
Daling nakontrolar sa Tigers ang duwa gamit ang ilang hait nga three-point shooting sa pagpangulo sa 5-foot-6 nga si Jai Reyes, kinsa mipatusak og duha ka tres sa 6:26 sa second period aron hungitan ang ilang koponan og 45-27 nga labaw.
Sa maong kuwarter, gihunong ang duwa dihang naglayog ang duha ka forward nga sila si Ricky Calimag sa Tigers ug Eric Rodriguez sa Bolts.
Sukad niadto, nanginit ang Tigers ug milusad og 17-6 rally aron inaton ang labaw ngadto sa 15 puntos, 70-55 sa nahabiling sayes minutos sa third period.
Sa final period, ang leading scorer sa Bolts nga si MacMac Cardona mipasulod og tulo ka triples nga nakapahiyos sa labaw, 78-69. Apan gisuklian sab dayon kini ni Anthony, kinsa mibubo og 13 puntos sa final period alang sa kinatibuk-ang 29 puntos.
Gawas ni Anthony, mikulit sab og double figures alang sa Tigers silasi David ug Macapagal nga adunay 23 ug 12 puntos matag usa.
Puntos Matag Usa
Powerade (122) - Anthony 29, David 23, Macapagal 12, R.Reyes 11, J.Reyes 10, Ivory 9, Calimag 8, Rizada 5, Ritualo 3, Allera 2
Meralco (109) - Cardona 31, Espinas 21, Isip 18, Ross 13, Mercado 10, Menor 5, Aljamal 4, Rodriguez 4, Weinstein 3. - BANAT NEWS