USJ-R Spiking Jaguars nagpanikad na sa NCG

CEBU, Philippines - Nangahas ang University of San Jose-Recoletos (USJ-R) Spiking Jaguars nga panalipdan nila ang ilang titulo sa National Collegiate Games nga gitakda sunod bulan didto sa kaulohan.

Ang Cebu Schools Athletic Foundation Inc. (CESAFI) men's grandslam champion, motutok karon sa ilang damgo nga mao ang pag-angkon og sunod-sunod nga national title dihang ilang harungon pag-usab ang labing maayong laking collegiate teams sa nagkadaiyang rehiyon dinhi sa nasud.

Matud pa ni Cebu Sports Hall of Famer coach Grace Antigua, nga gipaapil niya ang iyang mga batos og nagkalain-laing mga torneyo isip kabahin sa ilang pagpangandam alang sa NCG nga kanhi National Private Schools Athletic Association (PRISAA).

Ang labing bag-ong torneyo   nga ilang giapilan mao ang CESAFI versus GUV Cup All Stars. Ang Jaguars miharong sa mga piniling magduduwa sa Governor Gwen Unity Volleyball Cup.

Ang USJ-R magsalig sa labok sa miaging tuig nga MVP ug best blocker Jesriel Pino, best libero Jason Uy, best attacker Louijei Tipgos, Leoniel Sanchez, Ken Bhoyd Abunda, Kevin Casia, Jayvelle Rojas ug James Kevin Lawas.

Mikuha sab sila'g reinforcement sama ni Dennis Sepulveda sa University of San Carlos (USC), Mark Giducos sa University of the Visayas (UV) ug Allan Caspillo sa University of Southern Philippines Foundation (USPF). - BANAT NEWS