CEBU, Philippines - Gibanatan og maayo sa Alaska Aces ug walay kukaluoy nga midemolis sa Meralco Bolts, 97-80 sa nagpadayong Cebu City Mayor's Cup Invitational kagabii didto sa nagsugwak nga Cebu Coliseum.
Lab-as pa sa ilang come-from-behind nga kadaugan batok sa Powerade Tigers sa miaging gabii, ang Alaska nga gipangulohan sa ilang 6-foot-4 import Eddie Basden mikastigo dayon sa Meralco ug milansang og 32-15 nga bentaha paghuman sa unang kuwarter sa wala pa nila inata ang labaw ngadto sa 27 puntos sa iskor nga 77-50 sa nahabiling uno minuto sa third period.
Gipakita sa Alaska ni coach Tim Cone ang nabantog nilang triangle offense nga maoy mipatay sa depensa sa Meralco.
Imbes nga mosurender, ang Meralco nga nakamuritsing sab sa mga turnovers mi-aksiyon og bangon sa pagpangulo ni Macmac Cardona aron pahakan ang makabungog nga labaw ngadto na lang sa nuybe puntos, 73-82 sa tunga-tungang bahin sa final period.
Didto ra kutob ang ilang paningkamot kay ang Aces mipakita sab sa ilang maayong labok aron pagposte og 2-0 nga baraha.
Sa laing bahin, kun modaog ang Alaska karong gabii batok sa M. Lhuillier Kwarta Padala-Cebu Niños, sila maoy ilhon nga kampiyon.
Puntos Matag Usa
Alaska (97) - Basden 17, Baguio 16, Tenorio 12, Dela Cruz 11, Borboran 10, Thoss 8, Devance 8, Custodio 6, Burstcher 4, Hugnatan 3
Meralco (80) - Cardona 25, Aljamal 12, Ross 12, Isip 11, Weinstein 6, Bugia 5, Espinas 4, Gamalinda 4, Rodriguez 1. - BANAT NEWS