Kalbaryo sa Niños sugdan na

CEBU, Philippines - Kwarta Padala-Cebu Niños ang ilang tahas nga pamatud-an kun unsa ang ilang ikabuga batok sa mga elite PBA teams sa unang adlaw sa Cebu City Mayor’s Cup Basketball Invitational diha sa Cebu Coliseum.

Sa dili pa mopakita’g aksiyon ang host Cebu Niños batok sa Meralco Bolts sa alas 7:30 sa gabii, magpinaksitay una ang Powerade Tigers ug reigning Fiesta Cup champion Alaska Aces sa pasiunang duwa nga gikatakda sa alas-5:30 sa hapon.

Aron pagdugang og kusog sa ilang opensa ug sa rebounding, si legendary coach Raul 'Yayoy' Alcoseba mikuha pag-usab sa serbisyo sa import nga si Jeremy Robinson.

Sama sa gihapon, andam usab moburak ang mga beterano sa Niños nga sila si Bruce Dacia, Stephen Padilla, Abby Santos, Ian Saladaga Marlon Basco, Ariel Mepaña, Mark Ababon, Franklin Nailon ug Mark Magsumbol.

Iparada usab sa Niños ang mga bag-o nilang napuno nga si ex-Alaska cager Ariel Capuz ug Fil-Am Nick Monaco.

Alkontrahan sila sa mas gipalig-on nga Meralco nga gipangulohan sa kanhi PBA scoring king Marc Cardona ug ni superstar point-guard Solomon Mercado.

Moduga'g lig-on sa line-up sa Bolts ni coach Ryan Gregorio mao sila si Gabby Espinas, Christopher Ross, Nelbert Omolon, Hans Thiele ug Paolo Bugia.

Ugma, ang Niños moharong sa Powerade sa dili pa mag-abot pag-usab ang ilang dalan sa Alaska Aces sa Huwebes.

Ang torneyo mosunod og single round robin format diin ang koponan nga adunay labing nindot nga standing mao ang ibayaw isip kampiyon.

Ang mga tiket mapalit sa tag-P50 sa general admission, P150 sa upper box, P250 sa lower box ug P300 sa ringside.  (BANAT NEWS)