Wizards nakabihag

CEBU, Philippines - Krusyal nga three-pointer ang gibuhian ni John Wall, ang rookie sa Washington Wizards nga maoy nagluwas kanila aron mokulit og kulba-hinam nga 85-83 nga kadaogan batok sa no.1 team sa East ang Boston Celtics kagahapon sa nagpadayong duwa sa National Basketball Association (NBA) didto sa Verizon Center, ang homecourt sa Wizards.

Sa usa ka sold-out crowd sulod sa maong benyu diin mas daghan ang midapig sa Boston pinaagi sa pagsul-ob og green t-shirts, mi-rally ang Wizards kinsa nabiyaan unta og 16 puntos sa sayong bahin sa duwa aron pakuratan ang Celtics.

Gisaway ni Wall ang uban niyang teammates nga kuwang og kadasig ug dili maningkamot nga modaog. Ang Wizards layo pa gihapon sa playoff contention ug nahimutang sa ika-13 nga dapit sa East sa ilang 13-29 nga baraha kung itandi sa Celtics nga adunay 33-10, ang labing maayo og record nga nagsunod sa San Antonio Spurs nga maoy nagkupot sa labing maayong record nga 37-7 bisan pa og gilubong sila sa New Orleans Hornets, 72-96.

Samtang naputol ang lima ka sagunson nga daog sa Boston, maoy tinguha sa Washington nga putlon ang ilang 0-20 nga pilde sa road games atol sa ilang pagbisita didto sa New York ugmang adlawa.

 “I think tonight you should give us a road game because there were more Boston people here than Washington," matod pa ni coach Flip Saunders sa Wizards kinsa mikomedya sab sa pag-ingon “So we’re 1-20.”

Mi-iskor ug 16 puntos si Wall uban sa iyang unom ka rebounds ug upat ka assists alang sa Wizards kinsa aduna'y 13-9 nga baraha sa ilang homecourt.

Ang iyang layup sa kataposang 2:35 sa fourth period maoy naghatag og labaw pagbalik sa Wizards kinsa sa 2-0 ug ang iyang three-pointer maoy   naghatag sa Washington og 84-81 nga abante sa nahibiling 58 segundos sa duwa. 

Na-ilog pa unta sa Boston ang bola human sila mosikit ngadto sa 83-84 apan misipyat si Paul Pierce sa iya untang potential game-winner nga jumpshot ug si Wall maoy milabni sa kataposang rebound ug usa lang sa duha ka free throws ang iyang napasulod.

Sa ubang resulta kagahapon, gipatapsingan sa Dallas ang New Jersey, 87-86 ug gipatapsingan sab sa Detroit ang Phoenix, 75-74.

Gipakaging sa Philadelphia ang Utah, 96-85, gilubong sa Atlanta ang Charlotte, 103-87, gisungag sa Chicago ang Cleveland, 92-79, gilubong sab sa Miami ang Toronto, 120-103, naka-ipsot ang Oklahoma batok New York, 101-98, midaog ang Orlando batok sa Houston, 118-104, gipakuratan sa Memphis ang Milwaukee, 94-81, midaog ang Portland batok Indiana, 97-92 ug midaog ang LA Clippers batok sa Golden State, 113-109. (GGM gikan sa NBA.com)