Good luck, Azkals

Namatikdan nato karon nga hinay-hinay nang nakakuha og luna sa mga kasing-kasing sa mga Filipino ang football human sa 14 ka tuig niining walay pangalan nga nahimo sa regional ug international competitions.

Nakasuroy ako sa pipila ka mga tunghaan dinhi sa Sugbu ug nakasaksi sa interes karon sa kabataan sa maong sport. Siguro tungod ni sa gipakitang labok sa mga Philippine Azkals (Asong Kalye) sa nakalabay’ng 2010 Suzuki Cup.

Gipakuratan sa Pinoy booters ang kalibutan sa football human makaparang sa mga dagkung pangalan sa maong sports sa Asya sama sa Singapore, Myanmar, Vietnam ug Indonesia. Hasta ang Federation of International Football Associations (FIFA) kalit nga nagka-interes kanato.

Atong i-ampo nga karong umaabot Pebrero 9, 2011 atol sa sangka sa Azkals alang sa Asian Football Confederation Cup qualifiers batok sa Mongolia, makuha nato ang atong home advantage. Kay sa labing unang higayon, ang Azkals moduwa sa kaugalingon niining korte didto sa Panaad Stadium sa Bacolod City.

Hinuon, susama sa football team sa Pilipinas kaniadto, ang Mongolians wala igdungog sa natad sa football, busa dili gihapon kini kakompiyansahan. Wala kita kahibalo kun ‘purely luck’ lang dihang gi-serohan sa Azkals ang Vietnam 2-0 niadtong milabay’ng buwan, dili ba?

Manghinaut lang ta nga magkahiusa ang mga lider sa maong sports dinhi sa ato kay nadungog na ra ba usab ang panagbingkil sa kanhi presidente sa Philippine Football Federation ug sa bag-ong giila sa FIFA nga maoy mangulo karon sa PFF.

Human sa malampusong pagtimon sa kanhi coach sa Azkals nga si Simon Mcmenemy, kinsa wala mo-qualify sa rekisito sa FIFA giilisan siya karon ni Michael Weiss nga rehistradong European football coach, maayo unta og abayan gihapon kita og buwenas niini.

Ang nakab-ot sa Azkals sa Suzuki Cup layo pa kaayo sa tinuod kun ang target nato makasulod sa qualifier ug makapaduol sa ranking alang sa World Cup. Daghan pa kitang agiang torneyo ug maayo untang dili mahugno ang atong pangagpas.

* * *

Atong nabasahan sa usa ka artikulo sa website nga dili na HBO 24/7 ang mopasalida sa pay-per-view kun dili ang Showtime na sa CBS channel sa cable alang sa umaabot nga sangka ni Fighting Congressman Manny 'Pacman' Pacquiao ug ni Shane Mosley karong Mayo 7 didto sa Las Vegas, Nevada.

Bisan pa man asa ni nga channel ipagawas walay problema natong mga Pinoy, ang problema lang kun wala tay kuryente. Hehehe.

* * *

Pipila ka adlaw na ang nakalabay mitan-aw kita sa usa ka martial arts tournament. Usa ray ikasaway nako niadtong adlawa, ang mga marshals nila nga gi-assign sa pultahan.

Kay ngano man? Mura man og overacting ang ilang pag-inaktor bisan og gipakitaan na nimo og tiket, ambot tungod ba kaha kay excited sila o unsa ba kaha sobra ra kaayo ka estrikto ang mga dagway.

 Well, wala man ta mag-expect nga torneyo sa cooking o ba kaha sayaw sa ballet ang atong tan-awon, pero dili pud unta mag-inaktor og todo ang mga marshals sa gawas.

Kun mura'g hudlaton man gud sa mga magbantay sa gawas ang mga motan-aw nga mipalit sa tiket, wala nay motan-aw ninyo og balik, wala nay dugang income kining gipamunit nga mga marshals kunohay.

Tabi lang sa organizers kay nasayod ta nga wala siguro sila masayod niini, apan ang akoa lang ba sa mga gipangpunit nga mo-marshal sa mga susamang torneyo dili unta palabi og ‘inaktor’ nga molabaw pa og linihukan sa mga aktuwal nga ‘fighters’ nga maoy mosaka sa ring. Hehehe!

* * *

GREETINGS. Happy birthday to Brod. Insik of SIOUX.

* * *

PAGTULON-AN: "Justice without power is powerless, power without justice is tyranny." -- Blaise Pascal ug Book of Five Rings